নেশ্যনেল ডেস্ক,১৭ ছেপ্টেম্বৰ : হায়দৰাবাদত অনুষ্ঠিত হৈছে কংগ্ৰেছ ৱৰ্কিং কমিটিৰ বৈঠক । বৈঠকৰ আজি দ্বিতীয় তথা অন্তিম দিন । বৈঠকৰ অন্তিম দিনটোত দলৰ নেতাসকলৰ সৈতে ২০২৪ চনৰ লোকসভা নিৰ্বাচনত বিজেপিক পৰাস্ত কৰিবলৈ কংগ্ৰেছৰ লক্ষ্য নিৰ্ধাৰণ কৰে ।
দলটোৰ সভাপতি মল্লিকাৰ্জুন খাৰ্গেয়ে আগন্তুক প্ৰত্যাহ্বানৰ বিষয়েও আলোচনা কৰে । তেওঁ কয় যে এয়া কেৱল কংগ্ৰেছৰ বাবেই নহয়, তেওঁলোকে গণতন্ত্ৰৰ অস্তিত্ব ৰক্ষাৰ বিষয়ে চিন্তা কৰে আৰু তেওঁৰ দলৰ লক্ষ্য হ'ব লাগিব ২০২৪ চনৰ লোকসভা নিৰ্বাচনত বিজেপিক পৰাস্ত কৰা । তেওঁ কয় যে ২০২৪ চনৰ লোকসভা নিৰ্বাচন মহাত্মা গান্ধীৰ প্ৰতি কংগ্ৰেছৰ আটাইতকৈ উপযুক্ত শ্ৰদ্ধাঞ্জলি হ'ব ।
কংগ্ৰেছ ৱৰ্কিং কমিটিৰ বৈঠকত ভাষণ প্ৰদান কৰি খাৰ্গেয়ে কয় যে সকলোৱে আগন্তুক প্ৰত্যাহ্বানসমূহৰ বিষয়ে অৱগত । কেন্দ্ৰত থকা বিজেপি চৰকাৰক সমালোচনা কৰি খাৰ্গেয়ে কয় যে মহাৰাষ্ট্ৰৰ মুম্বাইত 'I.N.D.I.A' ব্লকৰ নেতাসকলৰ বৈঠকৰ সময়তে চৰকাৰে 'এক ৰাষ্ট্ৰ, এক নিৰ্বাচন' সন্দৰ্ভত এখন সমিতি গঠন কৰিছিল ।
বিজেপিক সমালোচনা কৰি তেওঁ কয় যে বিজেপিয়ে নিজৰ কাৰ্যসূচীৰ বাবে সকলো পৰম্পৰা ভংগ কৰি প্ৰাক্তন ৰাষ্ট্ৰপতি ৰামনাথ কোবিন্দক সমিতিৰ অধ্যক্ষ হিচাপে নিযুক্ত দিছে । তেওঁ লগতে কয় যে চৰকাৰ এনে ধৰণৰ পদক্ষেপ লোৱাৰ বাবে জনাজাত যাৰ কোনো অৰ্থ নাথাকে । নেতাগৰাকীয়ে কয় যে কংগ্ৰেছ দলে সংবিধানৰ ভেটি স্থাপন কৰিছিল আৰু এনেদৰে সংবিধানৰ সুৰক্ষা কংগ্ৰেছৰ কৰ্তব্য আৰু শেষ উশাহলৈকে কংগ্ৰেছে যুঁজ দিব লাগিব ।
কংগ্ৰেছৰ লক্ষ্য হ'ব ২০২৪ চনৰ লোকসভা নিৰ্বাচনত বিজেপিক পৰাস্ত কৰি দেশত বিকল্প চৰকাৰ গঠনৰ বাবে নিষ্ঠাৰে কাম কৰা । উল্লেখ্য যে ২০২৪ চনত মহাত্মা গান্ধীৰ কংগ্ৰেছ সভাপতি হিচাপে নিৰ্বাচনৰ শতবাৰ্ষিকীও উদযাপন কৰিব । বিজেপিক ক্ষমতাৰ পৰা উৎখাত কৰাটো মহাত্মা গান্ধীৰ প্ৰতি আটাইতকৈ উপযুক্ত শ্ৰদ্ধাঞ্জলি হ'ব বুলিও খাৰ্গেয়ে উল্লেখ কৰে ।
খাৰ্গেয়ে লগতে কয় যে লোকসভা নিৰ্বাচনৰ পূৰ্বে এই বছৰৰ শেষৰ ফালে ৫ খন ৰাজ্যৰ বিধানসভা নিৰ্বাচনো অনুষ্ঠিত হ'ব, সেয়েহে কংগ্ৰেছেও এই সকলো ৰাজ্যত আৰু জম্মু-কাশ্মীৰত সম্ভাৱ্য বিধানসভা নিৰ্বাচনৰ বাবে সাজু থাকিব লাগিব । ছত্তীশগড় আৰু ৰাজস্থানত কংগ্ৰেছ নেতৃত্বাধীন চৰকাৰৰ কাম-কাজৰ ওপৰত আলোকপাত কৰি খাৰ্গেয়ে কয় যে দুয়োখন ৰাজ্য চৰকাৰে সামাজিক ন্যায় আৰু সুদৃঢ়তাৰ এক নতুন আৰ্হি আগবঢ়াইছে । তেওঁৰ মতে কংগ্ৰেছে সমগ্ৰ দেশতে কল্যাণমূলক আঁচনিসমূহৰ প্ৰচাৰ কৰিব লাগিব ।
