নিউজ ডেস্ক, 21 ডিচেম্বৰ: ঔপনিৱেশিক যুগৰ অপৰাধমূলক আইনসমূহৰ স্থানত প্ৰণয়ন কৰিব বিচৰা তিনিখন নতুন বিধেয়কত সন্ত্ৰাসবাদ, লিঞ্চিং, ৰাষ্ট্ৰীয় নিৰাপত্তা বিপন্ন কৰা অপৰাধৰ দৰে অপৰাধৰ শাস্তি অধিক কঠোৰ কৰি তোলা হৈছে ৷ বৃহস্পতিবাৰে উচ্চ সদনে অনুমোদন জনায় এই বিধেয়কত । ৰাজ্যসভাত ধ্বনি ভোটৰ দ্বাৰা গৃহীত হয় বিধেয়ক । বুধবাৰে লোকসভাই এই বিধেয়কত অনুমোদন জনাইছিল ।
সংসদৰ উচ্চ সদনত বিতৰ্কৰ উত্তৰ দি গৃহমন্ত্ৰী অমিত শ্বাহে কয় যে ভাৰতীয় দণ্ডবিধি, ফৌজদাৰী বিধি আৰু ভাৰতীয় প্ৰমাণ আইন বাতিল আৰু সলনি কৰা বিধেয়কসমূহে অপৰাধমূলক ন্যায় ব্যৱস্থাত এক নতুন যুগৰ সূচনা কৰিব । ভাৰতীয় ন্যায় (দ্বিতীয়) সংহিতা, ভাৰতীয় নাগাৰিক সুৰক্ষা (দ্বিতীয়) সংহিতা আৰু ভাৰতীয় সাক্ষ্য (দ্বিতীয়) বিধেয়ক এতিয়া ৰাষ্ট্ৰপতিৰ সন্মতিৰ বাবে যাব, তাৰ পিচত আইনত পৰিণত হ’ব ।
ঠিক লোকসভাৰ দৰেই সংসদত ১৩ ডিচেম্বৰত সংঘটিত হোৱা নিৰাপত্তা ভংগ সন্দৰ্ভত আলোচনাৰ বাবে হেঁচা প্ৰয়োগ কৰি অশান্ত আচৰণৰ বাবে নিলম্বিত হোৱা প্ৰায়বোৰ বিৰোধী সাংসদৰ অনুপস্থিতিত ৰাজ্যসভাতো এই বিধেয় গৃহীত কৰা হৈছিল । বিতৰ্কৰ উত্তৰত শ্বাহে কয় যে নতুন অপৰাধ আইন কাৰ্যকৰী হ’লেই এফআইআৰৰ পৰা ৰায়দানলৈকে সমগ্ৰ প্ৰক্ৰিয়া অনলাইন হ’ব ।
বিধেয়কসমূহ কাৰ্যকৰী কৰিলে ‘তাৰিখ-পে-তৰিখ’ যুগৰ অন্ত পৰাটো নিশ্চিত হ’ব আৰু তিনি বছৰৰ পাছত ন্যায় প্ৰদান কৰা হ’ব বুলিও তেওঁ কয় । নতুন বিধানসমূহৰ বিষয়ে বিশদভাৱে উল্লেখ কৰি শ্বাহে কয় যে সন্ত্ৰাসবাদৰ সংজ্ঞা দিয়া হৈছে আৰু গণপ্ৰহাৰক মৃত্যুদণ্ডৰ শাস্তিযোগ্য কৰি তোলা হৈছে । লগতে দেশৰ বিৰুদ্ধে কাম কৰাসকলৰ বাবে কঠোৰ শাস্তি নিৰ্ধাৰণ কৰা হৈছে বুলিও তেওঁ কয় ।
বিৰোধী কংগ্ৰেছৰ অনুপস্থিতিয়ে তেওঁক দলটোৰ ওপৰত চুইপ লোৱাত বাধা নিদিলে ৷ শ্বাহে কয় যে "ইটালীয় চশমা" পিন্ধাসকলে ভাৰতীয় সংসদে নতুন অপৰাধমূলক আইন ফ্ৰেমৱৰ্ক কৰাৰ গৌৰৱ অনুভৱ কৰিব নোৱাৰে । তেওঁৰ ইটালীৰ বংশোদ্ভৱ দলটোৰ প্ৰাক্তন মুৰব্বী ছোনিয়া গান্ধীক এইদৰে কটাক্ষ কৰে ।
ইফালে কংগ্ৰেছৰ তিনিজন সাংসদ ডি.কে. সুৰেশ, নকুল নাথ, আৰু দীপক বাইজক সদনৰ কাম-কাজত বাৰে বাৰে ব্যাঘাত জন্মোৱাৰ বাবে শীতকালীন অধিবেশনৰ বাকী সময়ছোৱাৰ পৰা নিলম্বন কৰা হৈছিল । ১৮৬০ চনৰ ব্ৰিটিছ যুগৰ ভাৰতীয় দণ্ডবিধিৰ (আই পি চি), ১৯৭৩ চনৰ ফৌজদাৰী বিধি আইন (চি আৰ পি চি) আৰু ১৮৭২ চনৰ ভাৰতীয় প্ৰমাণ আইনখনৰ ঠাই ল’ব এই তিনিখন বিধেয়কে ।
৪ ডিচেম্বৰৰ পৰা আৰম্ভ হোৱা সংসদৰ শীতকালীন অধিৱেশন ২ জানুৱাৰীত সমাপ্ত হোৱাৰ কথা আছিল যদিও নিৰ্ধাৰিত তাৰিখৰ আগতেই ইয়াক সমাপ্ত কৰা হয় ৷
লগতে পঢ়ক: Year-ender 2023: ৩৭০ নং অনুচ্ছেদৰ পৰা সমলিংগীয় বিবাহলৈকে উচ্চতম ন্যায়ালয়ৰ
