নেশ্যনেল ডেস্ক, ২৪ জুলাই: ভাৰতৰ উপৰিও বিশ্বৰ আন আন দেশতো এতিয়া পেগাচাছ(PEGASUS)ৰ চৰ্চা অব্যাহত আছে । ভাৰতত পেগাচাছৰ বিতৰ্ক আৰম্ভ হোৱাৰ লগে লগে বিৰোধীয়ে বিজেপি চৰকাৰলৈ সন্দেহৰ আঙুলি টোৱাইছে । এইবাৰৰ পেগাচাছৰ জৰিয়তে নিৰীক্ষণ কৰাৰ প্ৰসংগ উত্থাপন কৰি মোডী চৰকাৰক 'ব্ৰিটিছ ৰাজত্ব' সৈতে তুলনা কৰিলে জম্মু-কাশ্মীৰৰ প্ৰাক্তন মুখ্যমন্ত্ৰী আৰু পিপলছ ডেম'ক্ৰেটিক পাৰ্টী(People’s Democratic Party)ৰ সভানেত্ৰী মেহবুবা মুফটীয়ে । শুকুৰবাৰে তেওঁ কয় যে, বিজেপিয়ে বিৰোধীৰ কণ্ঠ ৰুদ্ধ কৰিবলৈ এনেদৰে চোৰাংচোৱাগিৰি কৰিছে ।
বিজেপি চৰকাৰে স্বাধীনতাৰ পূৰ্বে ব্ৰিটিছে গ্ৰহণ কৰা নীতি অনুসৰণ কৰিছে বুলিও তেওঁ সমালোচনা কৰে । বিৰোধীৰে মোকাবিলা কৰিবলৈ পেগাচাছক এক অস্ত্ৰ হিচাপে ব্যৱহাৰ কৰিছে বুলিও তেওঁ অভিযোগ তোলে । মেহবুবা মুফটীয়ে টুইটযোগে কয় যে, ভাৰত চৰকাৰ দুৰ্বল হৈ পৰিছে আৰু এতিয়া নিৰ্লজ্জভাৱে নাগৰিকৰ মৌলিক মানৱ অধিকাৰ খৰ্ব কৰিছে । সংবাদ গোষ্ঠী দ্য ৱায়াৰে প্ৰকাশ কৰা মতে, ২০১৭-২০১৯ চনৰ মাজভাগত পেগাচাছৰ সম্ভাৱ্য নিৰীক্ষণ তালিকাত অন্তৰ্ভুক্ত হৈছিল মেহবুবা মুফটীৰ নম্বৰ ।
দ্য ৱায়াৰৰ তথ্য অনুসৰি, কাশ্মীৰৰ বিচ্ছিন্নতাবাদী নেতা বিলাল ল'ন, দিল্লী বিশ্ববিদ্যালয়ৰ প্ৰাক্তন অধ্যাপক এছ এ আৰ গিলানি, দুজন পি ডি পি সদস্য, মেহবুবা মুফটীৰ পৰিয়ালৰ সদস্য, জম্মু-কাশ্মীৰৰ 'আপনী পাৰ্টী'ৰ সভাপতি আলতাফ বুখাৰীৰ ভাতৃ, চৈয়দ আলী শ্বাহ গিলানি আৰু মিৰৱাইজ উমৰ ফাৰুকৰ পৰিয়ালৰ সদস্যসহ মুঠ ২৫ জন লোক এই তালিকাত আছে । এক বিবৃতিৰ জৰিয়তে হুৰিয়তৰ মুখপাত্ৰগৰাকীয়ে অধ্যক্ষ মিৰৱাইজ উমৰ ফাৰুক আৰু জ্যেষ্ঠ কাৰ্যবাহী সদস্য বিলাল ঘানি ল'ন আৰু মাছৰুৰ আব্বাছ আনছাৰিৰ ওপৰত নিৰীক্ষণ কৰা কাৰ্যক গৰিহণা দিয়ে ।
তেওঁ কয় যে, নিৰীক্ষণৰ বাবে মানুহৰ ফোন হেক কৰাটো পোনপটীয়াকৈ গোপনীয়তাৰ মৌলিক অধিকাৰ উলংঘণ ৷ লগতে ইয়াক মৌলিক মানৱ অধিকাৰ ইচ্ছাকৃতভাৱে খৰ্ব কৰা বুলিও ক'ব পৰা যায় ৷ এই কাৰ্যৰ সৈতে জড়িত লোকসকলকৰ বিৰুদ্ধে বিচাৰ কৰা উচিত বুলিও তেওঁ মন্তব্য কৰে । মুখপাত্ৰগৰাকীয়ে কয় যে, ফোন হেক কৰা কাৰ্যই প্ৰমাণিত কৰিছে যে জম্মু-কাশ্মীৰৰ জনসাধাৰণৰ মৌলিক মানৱ অধিকাৰ খৰ্ব ৰখা হৈছে । ইয়াৰ পূৰ্বে জম্মু-কাশ্মীৰৰ সাংবাদিক ডিএনএৰ প্ৰাক্তন নতুন দিল্লী ব্যুৰ' চীফ ইফতিখাৰ গিলানি, ইণ্ডিয়ান এক্সপ্ৰেছৰ মুজামিল জলীল, হিন্দুস্তান টাইমছৰ ঔৰংগজেৱ নকশবন্দী আৰু পিটিআইৰ চুমিৰ কৌলৰ নামো এই তালিকাত থকাৰ কথা পোহৰলৈ আহিছিল ।
লগতে পঢ়ক:সীমান্ত বিবাদ সমাধানৰ উদ্দেশ্যে অসম-মেঘালয়ৰ মুখ্যমন্ত্ৰীৰ বৈঠক
