নেশ্যনেল ডেস্ক,২৩ জুলাই : বানৰ কৱলত পৰিছে গুজৰাটৰ জুনাগড় । ১৯৮৪ চনৰ পাছত আটাইতকৈ বৃহৎ জলপ্লাৱনৰ সাক্ষী হৈছে জুনাগড়বাসী । আনহাতে সৌৰাষ্ট্ৰৰ কচ্ছতো দেওবাৰৰ পৰা তিনিদিনৰ বাবে ধাৰাসাৰ বৰষুণৰ সতৰ্কবাণী জাৰি কৰা হৈছে ।
উল্লেখ্য যে নেৰানেপেৰা বৰষুণৰ পাছতে গুজৰাটৰ জুনাগড়ৰ বিস্তীৰ্ণ অঞ্চল প্লাৱিত হৈছে । চহৰখনৰ প্ৰতিষ্ঠিত ৰাইজিবাগ অঞ্চলতো যথেষ্ট ক্ষতি হৈছে । জুনাগড় চহৰৰ সকলো পথতে দুই ফুটতকৈও অধিক পানী দেখা গৈছে । অত্যাধিক বৰষুণৰ বাবে বাট পথবোৰ নদীত পৰিণত হৈছে । ইফালে নলা নিষ্কাশন প্ৰণালী সম্পূৰ্ণ বিফল হোৱাৰ অভিযোগ উঠিছে । যাৰ বাবে নলাবোৰ ওফন্দি উঠিছে আৰু নলাৰ ভিতৰৰ পৰা পানী পথবোৰত সোমাইছে ।
চহৰখনৰ ব্যৱসায়ীসকলো যথেষ্ট সমস্যাৰ সন্মুখীন হ'ব লগা হৈছে । বৰষুণৰ পানী একাংশ ব্যৱসায়িক প্ৰতিষ্ঠাৰ ভিতৰত প্ৰৱেশ কৰিছে । একপ্ৰকাৰ পানীৰ তলত সম্পূৰ্ণ জুনাগড় চহৰ । ইফালে এনডিআৰএফৰ দলেও উদ্ধাৰ অভিযান অব্যাহত ৰাখিছে । কেইবাগৰাকী লোকক উদ্ধাৰ কৰি সুৰক্ষিত স্থানলৈ স্থানান্তৰ কৰা হৈছে । তেওঁলোকক খাদ্য সামগ্ৰীও যোগান ধৰা হৈছে ।
