নেশ্যনেল ডেস্ক, ৮ জুন: মঙলবাৰে পুৱা তৃণমূল কংগ্ৰেছ (TMC)ৰ বিধায়ক মদন মিত্ৰৰ পশ্চিমবংগৰ ভৱানীপুৰস্থিত বাসগৃহত ভয়াৱহ অগ্নিকাণ্ড সংঘটিত হয় । কথমপি প্ৰাণ ৰক্ষা পৰে বিধায়কগৰাকীৰ । অট্টালিকাটোৰ তলৰ মহলাত অগ্নিকাণ্ডৰ সূত্ৰপাত হোৱাৰ পিছতে ধোঁৱাই ছানি ধৰে বাসগৃহটো । ফলত মদন মিত্ৰই শ্বাস-প্ৰশ্বাসজনিত সমস্যাত ভোগে ।
অক্সিজেন সমৰ্থন দি তেওঁক ততাতৈয়াকৈ চিকিৎসালয়লৈ লৈ যোৱা হয় । জানিব পৰা মতে, মঙলবাৰে পুৱা প্ৰায় ১০ বজাত অট্টালিকাটোৰ তলৰ মহলাত অগ্নিকাণ্ডৰ সূত্ৰপাত হয় । মদন মিত্ৰৰ পৰিয়ালৰ সদস্যই তলৰ মহলাৰ পৰা ধোঁৱা ওলোৱা প্ৰত্যক্ষ কৰিছিল ।
অগ্নিকাণ্ড সন্দৰ্ভত তৃণমূল কংগ্ৰেছ (TMC)ৰ বিধায়ক মদন মিত্ৰই কয় যে, তেওঁ চি অ' পি ডি ৰোগী আৰু বহু পৰিমাণৰ কাৰ্বন-ডাই অক্সাইড কোঠাৰ ভিতৰত সোমোৱাৰ বাবে তেওঁ উশাহ-নিশাহ লোৱাত কষ্ট পাইছিল । পিছত পৰিয়ালৰ লোকে অক্সিজেনৰ যোগান ধৰে ।
বৰ্তমান তেওঁৰ স্বাস্থ্যৰ অৱস্থাৰ উন্নতি হৈছে বুলি জানিব পৰা গৈছে । আনহাতে, অগ্নিনিৰ্বাপক বাহিনীৰ তিনিখনকৈ বাহেনেৰে পুৰণি অট্টালিকাটোৰ জুই নিৰ্বাপিত কৰা হয় । অৱশ্যে মদন মিত্ৰই জুইৰ কাৰণ সম্পৰ্কে একো তথ্য প্ৰকাশ কৰা নাই ।
অগ্নি নিৰ্বাপক সেৱাৰ এজন বিষয়াই কয় যে, মদন মিত্ৰৰ অট্টালিকাটো বহু পুৰণি আৰু কি কাৰণত জুই লাগিছিল সেয়া জানিব পৰা হোৱা নাই । শ্বৰ্ট চাৰ্কিটৰ পৰাই অগ্নিকাণ্ডৰ সূত্ৰপাত হৈছে বুলি সন্দেহ প্ৰকাশ কৰিছে অগ্নিনিৰ্বাপক বাহিনীয়ে । অগ্নিকাণ্ড সন্দৰ্ভত তদন্ত কৰা হ'ব বুলিও বিষয়াজনে জানিবলৈ দিয়ে ।
লগতে পঢ়ক:বিজেপি মন্ত্ৰীৰ বিৰুদ্ধে চিপিআই(এম)ৰ গুৰুতৰ অভিযোগ
