মধ্য প্ৰদেশ-মহাৰাষ্ট্ৰৰ মাজত যাত্ৰীবাহী বাছ সেৱা স্থগিত

কৰ'ণা মহামাৰীৰ সংক্ৰমণ বৃদ্ধি হৈ থকা বাবে অহা ১৫ এপ্ৰিললৈকে মধ্য প্ৰদেশ-মহাৰাষ্ট্ৰৰ মাজত যাত্ৰীবাহী বাছ সেৱা স্থগিত কৰিলে মধ্য প্ৰদেশ চৰকাৰে । পূৰ্বে ৩১ মাৰ্চলৈকে দুয়োখন ৰাজ্যৰ মাজত বাছ চলাচলৰ ক্ষেত্ৰত নিষেধাজ্ঞা জাৰি কৰা হৈছিল যদিও এতিয়া ৰাজ্য চৰকাৰে এই সময়সীমা অহা ১৫ এপ্ৰিললৈকে বৃ্দ্ধি কৰিছে ।

নেশ্যনেল ডেস্ক, ৩১ মাৰ্চ: ক'ভিড-১৯ৰ বৰ্ধিত সংক্ৰমণৰ প্ৰতি লক্ষ্য ৰাখি মহাৰাষ্ট্ৰৰ পৰা যাত্ৰীবাহী বাছ অহাৰ ক্ষেত্ৰত জাৰি কৰা নিষেধাজ্ঞাৰ সময়সীমা বৃদ্ধি কৰিলে মধ্য প্ৰদেশ চৰকাৰে । অহা ১৫ এপ্ৰিললৈকে মধ্য প্ৰদেশ-মহাৰাষ্ট্ৰৰ মাজত যাত্ৰীবাহী বাছ সেৱা স্থগিত কৰা হৈছে । পূৰ্বে ৩১ মাৰ্চলৈকে বাছ সেৱা স্থগিত কৰাৰ নিৰ্দেশনা জাৰি কৰা হৈছিল । মধ্য প্ৰদেশৰ মুখ্যমন্ত্ৰী শিৱৰাজ সিং চৌহানে কেবিনেটৰ বৈঠকৰ পিছত জিলা উপায়ুক্তৰ সৈতে মহামাৰী সন্দৰ্ভত এক পৰ্যালোচনামূলক বৈঠকত মিলিত হয় ।

এই বৈঠকত অংশ লোৱা বিষয়াসকলে কয় যে, জিলাখনত ৰোগীক ৪-৬ হাজাৰ বিচনা যোগান ধৰিব পৰা যাব । মুখ্যমন্ত্ৰী শিৱৰাজ সিং চৌহানে কয় যে, ভূপালত মাস্ক পৰিধান নকৰা আৰু সামাজিক দূৰত্ব মানি নচলা লোকে ১০ হাজাৰ টকা জৰিমনা ভৰিব লাগিব । মুখ্যমন্ত্ৰীগৰাকীয়ে লগতে কয় যে, জনসাধাৰণৰ মাজত সজাগতা সৃষ্টিৰ প্ৰয়াস কৰিব লাগে আৰু তেওঁলোকক মাস্ক ব্যৱহাৰ কৰিবলৈ আহ্বান জনাব লাগে । হামিদিয়াসহ সকলো কেন্দ্ৰতে টীকাকৰণ প্ৰক্ৰিয়া দ্ৰুত কৰিব লাগে বুলিও মুখ্যমন্ত্ৰীগৰাকীয়ে মন্তব্য কৰে ।

অহা ১৫ এপ্ৰিললৈকে মধ্যপ্ৰদেশ-মহাৰাষ্ট্ৰৰ মাজত যাত্ৰীবাহী বাছ সেৱা স্থগিত

ইন্দোৰ, ভূপাল, জবলপুৰ, খাৰগোনৰ পৰিস্থিতিৰ প্ৰতি উদ্বেগ প্ৰকাশ কৰি তেওঁ কয় যে, এই ঠাইবোৰত কিছুমান মাইক্ৰ' কণ্টেইমেণ্ট জ'ন স্থাপন কৰি মহামাৰীৰ সংক্ৰমণ নিয়ন্ত্ৰণ কৰিব লাগে । যিকোনো উপায়েৰে সংক্ৰমণ প্ৰতিহত কৰিবলৈ, সংকট ব্যৱস্থাপনা গোটৰ সদস্যসকলৰ সৈতে আলোচনা কৰিবলৈ আৰু সিদ্ধান্ত গ্ৰহণ কৰিবলৈও পৰামৰ্শ দিয়ে ।

ব্যৱসায়িক কেন্দ্ৰস্থল হোৱা বাবে ইন্দোৰলৈ মহাৰাষ্ট্ৰ আৰু ৰাজ্যৰ সীমান্তৱৰ্তী জিলা বুৰহানপুৰ, বৰৱানী, খাৰগোন, খাণ্ডৱাকে ধৰি কেইবাটাও স্থানৰ পৰা প্ৰতিদিনে বহু বাহন আৰু মানুহৰ আগমণ হয় । সেয়েহে, সংশ্লিষ্ট জিলাবোৰৰ পৰা মধ্য প্ৰদেশলৈ চলাচল সীমিত কৰাৰ সিদ্ধান্ত লোৱা হৈছে । জলসম্পদ মন্ত্ৰী তুলসী চিলাৱতে কয় যে, ইন্দোৰ আৰু আন জিলাবোৰ মাজত ব্যৱসায়িক কাৰ্যকলাপ চলি থকাৰ বাবে সংক্ৰমণ দ্ৰুতগতিত বৃদ্ধি হৈছে ।

সেয়েহে, আজি পুনৰ মহাৰাষ্ট্ৰৰ সৈতে সংলগ্ন সীমান্তৰ জিলাবোৰৰ পৰা বাছ চলাচল নিয়ন্ত্ৰণ কৰিবলৈ নতুন নিৰ্দেশনা জাৰি কৰা হয় । মুখ্যমন্ত্ৰী শিৱৰাজ সিঙে বুধবাৰে ভিডিঅ' কনফাৰেন্সিঙৰ জৰিয়তে প্ৰতিখন জিলাৰ কৰ'ণা পৰিস্থিতিৰ পৰ্যালোচনা কৰে । টীকাকৰণ অভিযান দ্ৰুত গতিত সম্প্ৰসাৰিত কৰা হ'ব বুলিও তেওঁ জানিবলৈ দিয়ে । ইন্দোৰত প্ৰায় ৫০হাজাৰ প্ৰতিষেধক প্ৰদানৰ লক্ষ্য নিৰ্ধাৰণ কৰা হৈছে ।

বৰ্তমান ৰাজ্যখনৰ ক'ভিড চিকিৎসালয়সমূহত ৩৫০৬ জন ৰোগী আৰু মুঠ ৫৫৪৭ খন বিচনা আছে । বাকী ২১৯১ খন বিচনা এতিয়াও খালী হৈ আছে । আগন্তুক ১০ দিনৰ ভিতৰত কৰ'ণাৰ সংক্ৰমণ নিয়ন্ত্ৰণ কৰিবলৈ চৰকাৰে চেষ্টা কৰি আছে । এই ক্ষেত্ৰত, ৰাজ্যৰ সকলো জিলাৰ উপায়ুক্তসকলক কঠোৰ নিৰ্দেশনা দিয়া হৈছে ।

লগতে পঢ়ক:দ্বিতীয় পৰ্যায়ৰ নিৰ্বাচনৰ বাবে দৰঙ জিলা প্ৰশাসন