নিউজ ডেস্ক, 14 ডিচেম্বৰ: কৃষ্ণ জন্মভূমি-শ্বাহী ঈদগাহ মছজিদ গোচৰৰ ক্ষেত্ৰত এক গুৰুত্বপূৰ্ণ সিদ্ধান্ত গ্ৰহণ কৰিছে এলাহাবাদ উচ্চ ন্যায়ালয়ে ৷ বৃহস্পতিবাৰে মথুৰাৰ শ্ৰীকৃষ্ণ জন্মভূমি মন্দিৰত সংলগ্ন শ্বাহী ঈদগাহ চৌহদত আদালতৰ নিৰীক্ষণত জৰীপৰ অনুমতি প্ৰদান কৰে উচ্চ ন্যায়ালয়ে ।
আদালতে নিজৰ আদেশত মছজিদটোৰ জৰীপ চোৱাচিতা কৰিবলৈ এজন অধিবক্তা আয়ুক্ত নিযুক্তি দিবলৈ সন্মত হয় ৷ আবেদনকাৰীসকলে দাবী কৰে যে মছজিদটোত এসময়ত হিন্দু মন্দিৰ আছিল আৰু তাত কিছুমান কীৰ্তিচিহ্ন আছিল । আদালতে কয় যে অহা ১৮ ডিচেম্বৰত পৰৱৰ্তী শুনানিত এই সমীক্ষাৰ পদ্ধতিসমূহৰ বিষয়ে আলোচনা কৰা হ’ব ।
হিন্দু পক্ষৰ অধিবক্তা বিষ্ণু শংকৰ জৈনে কয়, "আমি অধিবক্তা আয়ুক্তৰ দ্বাৰা (শ্বাহী ঈদগাহ মছজিদ) জৰীপ কৰাৰ দাবী জনাইছিলো ৷ এলাহাবাদ উচ্চতম ন্যায়ালয়ে আমাৰ আবেদনত অনুমতি জনাইছে । ১৮ ডিচেম্বৰত মডেলিটিৰ সিদ্ধান্ত লোৱা হ'ব । আদালতে বিপক্ষৰ যুক্তি নাকচ কৰিছে । মোৰ দাবী আছিল যে শ্বাহী ঈদগাহ মছজিদত হিন্দু মন্দিৰৰ বহুত চিন আৰু প্ৰতীক আছে আৰু প্ৰকৃত অৱস্থান জানিবলৈ এজন অধিবক্তা আয়ুক্তৰ প্ৰয়োজন । ই আদালতৰ এক গুৰুত্বপূৰ্ণ ৰায় ।"
দীৰ্ঘদিনীয়া বিবাদৰ মাজত এলাহাবাদ উচ্চ ন্যায়ালয়ে মছজিদ পৰিদৰ্শনৰ অনুমতি দিয়াৰ সিদ্ধান্তটো এক উল্লেখযোগ্য দিশ । আদালতে এই বিবাদ সন্দৰ্ভত দুটা নতুন গোচৰো নিজলৈ হস্তান্তৰ কৰি মথুৰাৰ জিলা ন্যায়াধীশক এই সন্দৰ্ভত সংশ্লিষ্ট পক্ষক জাননী দিবলৈ নিৰ্দেশ দিছে ।
