নেশ্যনেল ডেস্ক, 27 নৱেম্বৰ: ‘‘গছ থাকিলেহে মানুহ থাকিব’’ এই কথাষাৰ আমি সকলোৱে জানো ৷ কিন্তু আটাইতকৈ ডাঙৰ প্ৰশ্নটো হ’ল যে, এই কথাষাৰ আমি বাৰু কিমান গুৰুত্ব সহকাৰে লওঁ ? কাৰণ মানুহ থাকিবৰ কাৰণে গছ নথকা কৰাটো মানুহৰ অভ্যাসত পৰিণত হৈছে ৷ উন্নয়নৰ নামত হাবি-বন কাটি, ঠাই মুকলি কৰি, ৰাস্তা-ঘাট বনোৱা হৈছে ৷ কিন্তু বসতি যিমানেই বাঢ়ি গৈ আছে, দিনক দিনে হাবি-বন সিমানেই কমি গৈ আছে ৷ গছ থাকিলেহে মানুহ থাকিব বোলা কথাষাৰ ভাবিবলৈ যেন পাহৰিয়েই গৈছে একাংশই ৷
কিন্তু ইয়াৰ সম্পূৰ্ণ বিপৰীত ছবি পৰিস্ফুট হৈছে মধ্য প্ৰদেশৰ খাণ্ডৱা চহৰত ৷ যি সময়ত উন্নয়ণৰ নামত গছ কাটি তহিলং কৰা হৈছে, সেই সময়ত মধ্য প্ৰদেশত দেখা পোৱা গ’ল ইয়াৰ সম্পূৰ্ণ এক বিপৰীত ছবি ৷ গছ কটাৰ পৰিৱৰ্তে গছ কেনেকৈ সংৰক্ষণ কৰিব পাৰি তাৰেই যেন এক উদাহৰণ দাঙি ধৰিলে সমাজসেৱক ৰিতেশ গোৱেলে ৷ প্ৰকৃতিপ্ৰেমী ৰিতেশ গোৱেলে এটা বা দুটা নহয় ১৫ জোপা গছ কটাৰ পৰা ৰক্ষা কৰিছে ৷ কিন্তু কেনেকৈ ৰক্ষা কৰিব পাৰিছে সেই কথা জানিলে আচৰিত হ’ব আপুনিও ৷
এতিয়া আহিছো মূল কথালৈ, খাণ্ডৱা চহৰৰ মাজমজিয়াস্থিত ১৫জোপা গছ কাটিবলগীয়া পৰিস্থিতিৰ সৃষ্টি হৈছিল ৷ এই কথা জানিব পাৰিছিল প্ৰকৃতিপ্ৰেমী ৰিতেশ গোৱেলাই ৷ তাৰ পিছতেই গছকেইজোপা কেনেকৈ বচাব তাৰ প্ৰয়াসত লাগি গৈছিল প্ৰকৃতি প্ৰেমীগৰাকীয়ে ৷ অৱশেষত গছ কটাৰ পৰিৱৰ্তে ১৫ জোপাকৈ গছ স্থানান্তৰ কৰাৰ সিদ্ধান্ত ল’লে ৰিতেশ গোৱেলাই (Khandwa save tree initiative) ৷ গছকেইজোপা স্থানান্তৰিত কৰি পুনৰ সজীৱ কৰি তোলাৰ অদ্ভুত প্ৰয়াস কৰিলে প্ৰকৃতি প্ৰেমীগৰাকীয়ে ৷ প্ৰথম অৱস্থাত ৭৫ বছৰীয়া এজোপা আঁহত গছ পুনৰুজ্জীৱনৰ বাবে ১৭ কিলোমিটাৰ দূৰৰ কলনীলৈ স্থানান্তৰ কৰা হৈছিল (75 years old peepal tree shifted to another place) ৷
প্ৰকৃতিপ্ৰেমী ৰিতেশ গোৱেলাই কয় যে, ক’ভিড সৃষ্ট পৰিৱেশত অক্সিজেনৰ অভাৱত সকলোৱে হাঁহাকাৰ কৰিবলগীয়া হৈছিল ৷ তেতিয়াই বুজি পাইছিলো এজোপা গছৰ গুৰুত্ব যে কিমান ৷ বিগত তিনিমাহৰ ভিতৰত বহু বিশাল গছ স্থানান্তৰিত কৰিছে হায়দৰাবাদৰ প্ৰকৃত প্ৰেমীগৰাকীয়ে ৷ তেওঁ ৰাসায়নিক প্ৰচেছিঙৰ লগতে ৩টা ক্ৰেন, এটা বুলড’জাৰৰ সহায়ত ছঘণ্টা জোৰা প্ৰচেষ্টাৰ অন্তত প্ৰথমে এজোপা গছ উভালিবলৈ সক্ষম হৈছিল বুলিও উল্লেখ কৰিলে প্ৰকৃতি প্ৰেমীগৰাকীয়ে (Khandwa unique initiative) ৷
কেৱল ইমানেই নহয়, ইয়াৰ পিছত তেওঁ যি পদক্ষেপ ল’লে সেয়াও আছিল প্ৰশংসনীয় ৷ এখন ট্ৰাকত আঁহত গছজোপা লৈ অঞ্জনী বালাজী নগৰৰ পৰা বালাজী ধাম চাইগাঁও মাখানলৈ এক পদযাত্ৰা উলিয়াই ৷ মানুহক প্ৰকৃতিৰ প্ৰতি সজাগ আৰু সচেতন কৰাই আছিল এই পদযাত্ৰাৰ মূল উদ্দেশ্য । চহৰখনৰ বহু ঠাইত এইযাত্ৰা কৰি শনিবাৰে নিশা প্ৰায় ১১ বজাত বালাজী ধামত উপস্থিত হয় পদযাত্ৰী । ছয়গাঁৱৰ বালাজিধামত ৮১ ফুট ওখ ভগৱান বালাজীৰ মূৰ্তিৰ সমীপত এখন ডাঙৰ বাগিচাত আঁহত গছজোপা ৰোপণ কৰা হ’ব বুলি জানিবলৈ দিয়ে প্ৰকৃতিপ্ৰেমীগৰাকীয়ে ।
ইফালে আন এজন প্ৰকৃতিপ্ৰেমী সুনীল জৈনে কয়, "এজোপা গছ কাটিবলৈ আমাক যি অনুমতি লাগে, সেই অনুমতিৰ নিয়ম অতি সহজ, কিন্তু এজোপা গছ স্থানান্তৰিত কৰিবলৈ অনুমতিৰ সময় লাগিছিল ৩ মাহ । বন বিভাগ আৰু পৌৰ নিগমৰ বাবে বহু সময় লাগিছিল ।" গছ স্থানান্তৰ কৰাৰ আইনখন বিচাৰি উলিয়াই পৌৰ নিগমে অৱশেষত অনুমতি দিছিল ।"
লগতে পঢ়ক: লখিমপুৰক সেউজীয়া কৰাৰ প্ৰয়াস জিলা বন বিভাগৰ
