নেশ্যনেল ডেস্ক, 29 মাৰ্চ: ফেব্ৰুৱাৰী মাহৰ 26 তাৰিখে এগৰাকী কাশ্মীৰী পণ্ডিতক সন্দেহজনক সন্ত্ৰাসবাদীৰ গোটে গুলীয়াই হত্যা কৰা ঘটনাৰ তদন্ত অব্যাহত আছে ৷ শনিবাৰে ঘটনাৰ তদন্তৰ বাবে দক্ষিণ কাশ্মীৰৰ পুলৱামাৰ আচান গাঁৱত অভিযান চলাই জম্মু-কাশ্মীৰ ৰাজ্যিক অনুসন্ধান সংস্থাই (SIA) ৷
এই সন্দৰ্ভত জম্মু-কাশ্মীৰ ৰাজ্যিক অনুসন্ধান সংস্থাৰ এগৰাকী বিষয়াই সদৰী কৰা অনুসৰি, ‘‘26 ফেব্ৰুৱাৰীত পুলৱামাৰ আচানত সন্দেহযুক্ত উগ্ৰপন্থীয়ে গুলীয়াই হত্যা কৰা কাশ্মীৰী পণ্ডিত সঞ্জয় শৰ্মাৰ হত্যাৰ তদন্তৰ সন্দৰ্ভত আচানত অভিযান অব্যাহত আছে ৷ স্থানীয় আৰক্ষী আৰু চিআৰপিএফৰ সহায়ত অনুসন্ধানকাৰী সংস্থাটোৰ চোৰাংচোৱাই অভিযান চলাই আছে (Kashmiri Pandit killing case) ।’’
উল্লেখ্য যে, সন্দেহজনক সন্ত্ৰাসবাদীৰ গুলীত নিহত হোৱা সঞ্জয় শৰ্মা নামৰ ব্যক্তিগৰাকী (40) এটিএম গাৰ্ড হিচাবে কৰ্মৰত আছিল ৷ শূন্য দূৰত্বৰ পৰা সঞ্জয় শৰ্মাৰ বুকুত তিনিটাকৈ গুলী নিক্ষেপ কৰি পলায়ন কৰিছিল দুৰ্বৃত্ত ৷ লগে লগেই সঞ্জয় শৰ্মাক চিকিৎসালয়ত ভৰ্তি কৰোৱা হৈছিল যদিও মৃত ঘোষণা কৰে চিকিৎসকে ৷ শনিবাৰে এগৰাকী শীৰ্ষ আৰক্ষী বিষয়াৰ নেতৃত্বত জম্মু-কাশ্মীৰ ৰাজ্যিক অনুসন্ধান সংস্থাৰ এটা দল ঘটনাস্থলীত উপস্থিত হৈ সমগ্ৰ ঘটনা সন্দৰ্ভত সোধা-পোচা কৰে (SIA raid in Pulwama village) ৷
তথ্য অনুসৰি ফেব্ৰুৱাৰী মাহত দক্ষিণ কাশ্মীৰৰ আচান গাঁৱৰ পৰিস্থিতি অৱনতি হোৱাৰ বাবে আৰক্ষীয়ে এটিএম গাৰ্ড হিচাবে কৰ্মৰত সঞ্জয় শৰ্মাক কৰ্মক্ষেত্ৰলৈ অহাত বাধা প্ৰদান কৰিছিল যদিও নিয়মিত কৰ্মক্ষেত্ৰলৈ অহা যোৱা কৰি আছিল সঞ্জই শৰ্মাই ৷ যাৰ বাবে সহজেই সন্দেহজনক সন্ত্ৰাসবাদী গোটৰ লক্ষ্য হৈ পৰে সঞ্জয় শৰ্মা ৷ এই ঘটনাৰ পাচতে অধিক অৱনতি হয় পুলৱামাৰ আচান গাঁৱৰ আইন-শৃংখলা পৰিস্থিতি ৷ আনহাতে, স্থানীয় লোকেও এই হত্যাকাণ্ডৰ বিৰোধিতাৰে প্ৰতিবাদ সাব্যস্ত কৰি ঘটনাৰ উচিত তদন্তৰ দাবী উত্থাপন কৰে (Kashmiri pandit Sanjay Sharma killed) ৷
স্মৰ্তব্য যে, সঞ্জয় শৰ্মাক হত্যা কৰাৰ মাত্ৰ কেইটামান দিনৰ পূৰ্বে অনন্তনাগ জিলাৰ এটা মছজিদৰ বাহিৰত নিৰ্বিচাৰ গুলীচালনা কৰিছিল দুৰ্বত্তই ৷ এই গুলীচালনাত আহত হৈছিল আছিফ ঘানি নামৰ এগৰাকী লোক ৷ ইফালে, 2022 বৰ্ষত জম্মু-কাশ্মীৰত পৃথক পৃথক ঘটনাত সন্ত্ৰাসবাদীৰ আক্ৰমণত 6 জন কাশ্মীৰী পণ্ডিতৰ মৃত্যু হৈছিল (Kashmiri pandit killing incident) ৷
লগতে পঢ়ক: Amritpal Singh updates: খালিস্তানী নেতা অমৃতপাল সিঙে আত্মসমৰ্পণ কৰাৰ সম্ভাৱনা
