নেশ্যনেল ডেস্ক,10 জুলাই : প্ৰধানমন্ত্ৰীৰ সম্প্ৰসাৰিত মন্ত্ৰীসভাত স্থান পালে যোৱা বছৰ কংগ্ৰেছ ত্যাগ কৰি বিজেপিত যোগদান কৰা জ্যোতিৰাদিত্য সিন্ধিয়াই (Jyotiraditya Scindia) । বুধবাৰে ৰাষ্ট্ৰপতি ভৱনৰ শপত গ্ৰহণ অনুষ্ঠানত প্ৰধানমন্ত্ৰী নৰেন্দ্ৰ মোডী (Narendra Modi) নেতৃত্বাধীন চৰকাৰত কেন্দ্ৰীয় মন্ত্ৰী (Central minister) হিচাপে শপত গ্ৰহণ কৰে সিন্ধিয়াই । ইয়াৰ পিছতে তেওঁক অসামৰিক বিমান পৰিবহণ মন্ত্ৰীৰ (Civil Aviation Minister) দায়িত্ব দিয়া হয় ।
জ্যোতিৰাদিত্য সিন্ধিয়াই শুকুৰবাৰে দেশৰ ৩৩ তম অসামৰিক বিমান পৰিবহণ মন্ত্ৰী হিচাপে দায়িত্ব গ্ৰহণ কৰে । সিন্ধিয়াই প্ৰাক্তন বিমান মন্ত্ৰী হৰদীপ সিং পুৰীৰ উপস্থিতিত দায়িত্ব গ্ৰহণ কৰে । কেন্দ্ৰীয় কৃষি মন্ত্ৰী নৰেন্দ্ৰ সিং টোমৰেও সিন্ধিয়াক অভিনন্দন জনোৱাৰ বাবে অসামৰিক বিমান পৰিবহণ মন্ত্ৰালয়ত উপস্থিত হয় ।
উল্লেখ্য যে, জ্যোতিৰাদিত্যৰ পিতৃ মাধৱৰাও সিন্ধিয়াই পূৰ্বে অসামৰিক বিমান পৰিবহণ মন্ত্ৰীৰ দায়িত্বত ১৯৯১ চনৰ পৰা ১৯৯৩ চনলৈ কাৰ্যনিৰ্বাহ কৰিছিল । মন্ত্ৰী হিচাপে শপত লোৱাৰ পিছতে জ্যোতিৰাদিত্য সিন্ধিয়াই পিতৃক সোঁৱৰণ কৰি সপোন পূৰণ হোৱা বুলি মন্তব্য কৰে ৷ মধ্য প্ৰদেশত কংগ্ৰেছৰ শাসনৰ পিছত যোৱা বছৰ ৰাজ্যখনত বিজেপিয়ে পুনৰ ক্ষমতালৈ ঘূৰি অহাৰ ক্ষেত্ৰত সিন্ধিয়াই গুৰুত্বপূৰ্ণ ভূমিকা পালন কৰিছিল ।
সিন্ধিয়াৰ প্ৰতি অনুগত্য স্বীকাৰ কৰি ২২ জন কংগ্ৰেছ বিধায়কে পদত্যাগ কৰিছিল ৷ যাৰ ফলত কমল নাথ নেতৃত্বাধীন চৰকাৰত সংকটৰ সৃষ্টি হৈছিল । স্পষ্টভাষী আৰু আকৰ্ষণীয় ব্যক্তিত্বৰ ৫০ বছৰীয়া সিন্ধিয়া কংগ্ৰেছ নেতৃত্বাধীন ইউপিএ চৰকাৰৰ যোগাযোগ আৰু তথ্য প্ৰযুক্তিৰ ৰাজ্যিক মন্ত্ৰী আছিল । সিন্ধিয়া মধ্য প্ৰদেশৰ পৰা ৰাজ্যসভাৰ সাংসদ আছিল ।
তেওঁ ২০০৯-২০১২ চনত ইউপিএৰ দ্বিতীয় কাৰ্যকালত চৰকাৰৰ কেন্দ্ৰীয় বাণিজ্য আৰু উদ্যোগ ৰাজ্যিক মন্ত্ৰী আছিল । তদুপৰি ২০১২-২০১৪ চনত কেন্দ্ৰীয় শক্তি ৰাজ্যিক মন্ত্ৰী (স্বতন্ত্ৰ) আছিল । পিতৃ মাধৱৰাও সিন্ধিয়াৰ (Madhavrao Scindia) বিমান দুৰ্ঘটনাত মৃত্যু হোৱাৰ পিছতে গোৱালিয়ৰৰ ৰাজ পৰিয়ালৰ সৈতে সম্পৰ্ক থকা জ্যোতিৰাদিত্য সিন্ধিয়া প্ৰথমবাৰৰ বাবে ২০০২ চনত গুণা সমষ্টিৰ পৰা লোকসভালৈ নিৰ্বাচিত হৈছিল । মাধৱৰাও সিন্ধিয়াই ১৯৭১ চনত ২৬ বছৰ বয়সত লোকসভালৈ নিৰ্বাচিত হোৱাৰ লগতে গোৱালিয়ৰ আৰু গুণা সমষ্টিৰ পৰা একেৰাহে ৯ বাৰকৈ নিৰ্বাচনত জয়ী হৈছিল ।
জ্যোতিৰাদিত্য সিন্ধিয়াই ২০১৯ ৰ লোকসভা নিৰ্বাচনত আশ্চৰ্যজনকভাৱে পৰাজয়ৰ সন্মুখীন হৈছিল । সিন্ধিয়া মধ্য প্ৰদেশ ক্ৰিকেট সংস্থাৰ সভাপতি আছিল । বিজেপি নেতাজনে ষ্টেনফ’ৰ্ড বিশ্ববিদ্যালয়ৰ (Stanford University) পৰা এমবিএ আৰু হাৰ্ভাৰ্ড বিশ্ববিদ্যালয়ৰ (Harvard University) পৰা স্নাতক ডিগ্ৰী লাভ কৰিছিল ।
লগতে পঢ়ক : দেশৰ অক্সিজেন নাটনিক লৈ প্ৰধানমন্ত্ৰীৰ অধ্যক্ষতাত বিশেষ বৈঠক
