নেশ্যনেল ডেস্ক, ২১ মে' : অৱশেষত মুকলি আকাশৰ তললৈ আহিল শ্বীনা বৰা হত্যাকাণ্ডৰ (Sheena Bora Murder Case) মূল অভিযুক্ত ইন্দ্ৰাণী মুখাৰ্জী । উচ্চতম ন্যায়ালয়ে জামিন মঞ্জুৰ কৰাৰ পাছতে শুকুৰবাৰে সন্ধিয়া বাইকুল্লা কাৰাগাৰৰ পৰা ওলাই আহে ইন্দ্ৰাণী মুখাৰ্জী (Indrani Mukherjea released from Byculla jail)। ৬ বছৰতকৈও অধিক সময়ত কাৰাগাৰত থকা ইন্দ্ৰাণীয়ে কাৰাগাৰৰ পৰা ওলাই আহিয়ে আনন্দিত বুলি সংবাদমাধ্যমৰ আগত মন্তব্য কৰে ।
কাৰাগাৰৰ পৰা ওলাইয়ে মুখাৰ্জীয়ে তেওঁৰ অধিবক্তা ছানা ৰইছ শ্বেখক সাৱটি ধৰা দেখা গৈছিল । তাৰ পাছত অধিবক্তাগৰাকীৰ বাহনত উঠি ৱৰ্লিস্থিত ফ্লেটলৈ ৰাওনা হয় ইন্দ্ৰাণী মুখাৰ্জী । সংবাদমাধ্যমৰ সন্মুখত বিশেষ মন্তব্য নকৰিলেও ইন্দ্ৰাণীৰ চেহেৰাটোক লৈ সামাজিক মাধ্যমত বিশেষ চৰ্চা হোৱা দেখা গৈছে । পূৰ্বে বগা চুলিৰে দেখি থকা ইন্দ্ৰাণীৰ ক'লা চুলি দেখি বহুতে বিভিন্ন ধৰণৰ মন্তব্য কৰা দেখা গৈছে । একাংশই কোৱা মতে তেওঁৰ কাৰাগাৰৰ ভিতৰত বিউটি পাৰ্লাৰ আছে য'ত তেওঁ চুলিখিনিত ৰং সানিছে ।
উল্লেখ্য যে শ্বীনা বৰা হত্যাকাণ্ডৰ গোচৰটো চিবিআইয়ে তদন্ত কৰি আছে (CBI investigating Sheena Bora murder case)। তদন্তৰ প্ৰতিবেদন অনুসৰি ২০১২ চনৰ এপ্ৰিল মাহত শ্বীনা বৰাক হত্যা কৰা হৈছিল । কিন্তু ২০১৫ চনৰ ২১ আগষ্টত অবৈধভাৱে অস্ত্ৰৰ সৈতে ইন্দ্ৰাণীৰ প্ৰাক্তন গাড়ী চালক শ্যামবৰ ৰায়ক গ্ৰেপ্তাৰ কৰাৰ পাছত হে এই ঘটনাটো পোহৰলৈ আহে ।
জেৰাৰ সময়ত, ৰায়ে আৰক্ষীক উক্ত হত্যাকাণ্ডটো সম্পৰ্কে কৈছিল । ৰায়ে দাবী কৰিছিল যে পিটাৰ মুখাৰ্জীৰ পত্নী ইন্দ্ৰাণীয়ে তেওঁৰ প্ৰাক্তন স্বামী সঞ্জীৱ খান্নাৰ সহায়ত নিজৰে কন্যা শ্বীনাক হত্যা কৰিছিল । চিবিআইৰ অনুসন্ধানত পোহৰলৈ আহিছিল যে পিটাৰ মুখাৰ্জীৰ পুত্ৰ ৰাহুল মুখাৰ্জীৰ সৈতে শ্বীনা বৰাৰ সম্পৰ্কক লৈ সন্তুষ্ট নাছিল ইন্দ্ৰাণী মুখাৰ্জী ।
শেহতীয়াকৈ ইন্দ্ৰাণী মুখাৰ্জীয়ে চিবিআইলৈ এখন পত্ৰ প্ৰেৰণ কৰি কৈছিল যে তেওঁৰ জীয়েক শ্বীনা বৰা এতিয়াও জীয়াই আছে । যাক লৈ তীব্ৰ চাঞ্চল্যৰ সৃষ্টি হৈছিল । অৱশ্যে চিবিআইয়ে স্পষ্ট কৰি দিছে যে আদালতৰ হস্তক্ষেপ নোহোৱালৈকে এই দিশটো তেওঁলোকে গ্ৰহণ নকৰে ।
লগতে পঢ়ক :Sheena Bora murder case : ছবছৰ পাঁচ মাহৰ পাচত জামিন পালে ইন্দ্ৰাণী মুখাৰ্জীয়ে
