নিউজ ডেস্ক, ২৩ ছেপ্টেম্বৰ : উৎসৱৰ বতৰ সমাগত । সাধাৰণতে ছেপ্টেম্বৰৰ শেষৰ পৰায়ে আৰম্ভ হয় উৎসৱৰ বতৰ । এই সময়ছোৱাত ৰে'লত যাত্ৰীৰ প্ৰচণ্ড ভিৰ হয় । ফলত ৰে'লযাত্ৰীসকল যথেষ্ট অসুবিধাৰ সন্মুখীন হয় । বিশেষকৈ দেৱালী আৰু ছট পূজাত ঘৰলৈ যাবলগা লোকসকলে এই সমস্যাত ভোগে । এইবাৰো যাত্ৰীসকল সমস্যাৰ সন্মুখীন হ'ব এই সময়ছোৱাত । এই কথা ৰে'লত আসন বুক কৰাৰ পৰায়ে অনুমান কৰিব পাৰি । চাৰি মাহ পূৰ্বেই আৰম্ভ হোৱা আসনৰ বুকিঙে পূৰ্বৰ সকলো ৰেকৰ্ড ভংগ কৰিছে । দেৱালী আৰু ছট পূজাৰ বাবে এতিয়াও দুমাহ বাকী আছে । কিন্তু ৰে'লৰ আসনবোৰ পূৰ্ণ হৈ গৈছে । আনহাতে, বহু ৰে'লত বুকিং বন্ধ কৰা হৈছে । ফলত যাত্ৰীসকলে বিশেষ ৰে'ল চলাব বুলি আশা কৰিছে । ৰে'ল বিষয়াসকলৰ মতে, যাত্ৰীৰ ভিৰৰ প্ৰতি লক্ষ্য ৰাখি বিশেষ ৰে'ল চলাবলৈ সিদ্ধান্ত লোৱা হ'ব ।
১৫ অক্টোবৰৰ পৰা আৰম্ভ হ'ব নৱৰাত্ৰি । ২৪ অক্টোবৰত দশেৰা । দশেৰাৰ সময়ত দিল্লীৰ পৰা পূৰ্বাঞ্চললৈ যাবলগা অধিকাংশ ৰে'লতেই খালী আসন নাই । বন্দে ভাৰতকে ধৰি শিৱ গংগা, কাশী বিশ্বনাথ আদি কেইখনমান ৰে'লতে আসন খালী আছে । সেয়ে যাত্ৰীসকলে এই ৰে'লকেইখনত এই মুহূৰ্তত টিকট বুক কৰিব পাৰে ।
শ্লীপাৰ শ্ৰেণীত বেছিভাগ ৰে'লৰে ১০ অক্টোবৰৰ পিছতহে অপেক্ষাৰ তালিকা আছে । দীপাৱলী আৰু ছট পূজাৰ সময়ত ভ্ৰমণ কৰিবলগা যাত্ৰীসকলৰ অধিক সমস্যা হৈছে । দেৱালী ১২ নৱেম্বৰত । দিল্লী এনচিআৰত বাস কৰা বহুসংখ্যক লোক দেৱালীত তেওঁলোকৰ ঘৰলৈ যায় । তেওঁলোকে ইতিমধ্যে ঘৰলৈ যাবলৈ ৰে'লত টিকট বুক কৰিছে । কিন্তু বৰ্তমান যাত্ৰীসকলে ৰে'লত আসন পোৱা নাই । প্ৰায় সকলো পথৰে ৰে'লত দীঘলীয়া প্ৰতীক্ষা সূচী চলি আছে । যাৰ বাবে টিকট নিশ্চিত কৰাৰ আশাও কম । আনহাতে, ৰে'ল বিষয়াসকলে জনাইছে যে প্ৰতিবছৰে যাত্ৰীৰ সংখ্যা বিবেচনা কৰি দেৱালীত বিশেষ ৰে'ল চলোৱা হয় ।
ৰে'লৱে বিষয়াসকলে জনাইছে যে দীপাৱলী আৰু ছট পূজাৰ সময়ত যাত্ৰীৰ যথেষ্ট ভিৰ হয় । এই কথা মনত ৰাখি ৰে'ল ষ্টেচনসমূহত অধিকসংখ্যক বিশেষ ৰে'ল চলোৱাৰ লগতে অতিৰিক্ত ব্যৱস্থাও কৰা হয় । ইয়াৰ বাবে বিভিন্ন পথৰ ৰে'লৰ ভিৰৰ পৰ্যালোচনা কৰা হৈছে । সেই অনুসৰি শীঘ্ৰেই উৎসৱৰ বতৰত বিশেষ ৰে'ল চলোৱাৰ কথা ঘোষণা কৰা হ'ব ।
আনহাতে, ১৭-ৰ পৰা ১৯ নৱেম্বৰলৈ ছট পূজা । এইটো হৈছে পূব উত্তৰ প্ৰদেশ আৰু বিহাৰৰ এক মুখ্য উৎসৱ । বহুসংখ্যক লোকে এই উৎসৱ উদযাপন কৰিবলৈ তেওঁলোকৰ ঘৰলৈ যায় । এইবাৰো মানুহে ইতিমধ্যে ছট উৎসৱত ঘৰলৈ যাবলৈ ৰে'লত টিকট বুক কৰিছে । বৰ্তমান ৰে'লত দীঘলীয়া অপেক্ষা তালিকা, সংৰক্ষিত আসন পাবলৈও সক্ষম হোৱা নাই ।
সেয়ে ৰে'লৱে সূত্ৰই জনাইছে যে উৎসৱৰ এসপ্তাহ পূৰ্বে বিশেষ ৰে'ল চলাবলৈ সাজু হৈছে ৰে'ল বিভাগ । অৱশ্যে কোনটো পথত কিমানখন ৰে'ল চলিব সেয়া এতিয়াও নিৰ্ধাৰণ কৰা হোৱা নাই ।
দীপাৱলীৰ সময়ত পূৰ্বাঞ্চললৈ যাবলগা ৰে'লৰ অপেক্ষা তালিকা
| ৰে'ল | অপেক্ষা |
| নতুন দিল্লী-বাৰাণসী বন্দে ভাৰত | ১৭৭ |
| শিৱ গংগা | ২০২ |
| বাৰাণসী এক্সপ্ৰেছ | ১৮২ |
| মহামনা | ১৩২ |
| গৰীৱ ৰথ | ২০০ |
| কাশী বিশ্বাথ | ১১৪ |
| কলকাতা ৰাজধানী | ১৭৫ |
| সম্পূৰ্ণ ক্ৰান্তি এক্সপ্ৰেছ | ২৯১ |
| সীমাঞ্চল | ১২৪ |
| ফাৰাক্কা | ১৮১ |
দশেৰাৰ সময়ত পূৰ্বাঞ্চলৈ আৰু বিহাৰলৈ যাবলগা ৰে'লৰ অপেক্ষা তালিকা
| ৰে'ল | অপেক্ষা |
| সম্পূৰ্ণ ক্ৰান্তি | ৬০ |
| পূৰ্বা এক্সপ্ৰেছ | ৭৯ |
| বিক্ৰমশিলা এক্সপ্ৰেছ | ৯৭ |
| ব্ৰহ্মপুত্ৰ মেইল | ৭৮ |
| মহানন্দা এক্সপ্ৰেছ | ৫০ |
(বিঃদ্ৰঃ : ৰে'লত অপেক্ষাৰ স্থিতি ২২ ছেপ্টেম্বৰৰ পূৰ্বৰ)
লগতে পঢ়ক :Land for Job scam: ভূমিৰ বিনিময়ত চাকৰি কেলেংকাৰী গোচৰত লালু-তেজস্বীসহ 17 অভিযুক্তলৈ আদালতৰ চমন
