নিউজ ডেস্ক,২৭ ফেব্ৰুৱাৰী : পাকিস্তানৰ বিৰুদ্ধে ১৯৭১ চনৰ যুদ্ধ জয়ৰ ৫০ বছৰ সম্পূৰ্ণ হোৱাত সেই যুদ্ধ স্মৃতি হিচাপে ভাৰতীয় বায়ু সেনাই বাংলাদেশক বিশেষ উপহাৰ প্ৰদান কৰে । ভাৰতীয় বায়ু সেনাৰ প্ৰধান আৰ কে এছ ভাদুৰিয়াই বাংলাদেশক ঐতিহাসিক এলৌয়েট-III হেলিকপ্টাৰ প্ৰদান কৰে আৰু বাংলাদেশ বায়ু সেনাইও ভাৰতক উপহাৰ হিচাপে এফ-৮৬ চাব্ৰে বিমান প্ৰদান কৰে ।
ভাৰতীয় বায়ু সেনাই টুইটযোগে এই উপহাৰৰ কথা উল্লেখ কৰা লগতে দুয়োখন দেশৰ সংগ্ৰহালয়ত এই উপহাৰে বিশেষ তাৎপৰ্য বহন কৰিব বুলি উল্লেখ কৰে । ভাদুৰিয়াৰ চাৰিদিনীয়া বাংলাদেশ ভ্ৰমণৰ সময়ত ঢাকাত বিমানৰ বিনিময় প্ৰক্ৰিয়াৰ আয়োজন কৰা হয় । সেনা প্ৰধানগৰাকীয়ে বাংলাদেশৰ বিভিন্ন এয়াৰবেচ পৰিদৰ্শন কৰে আৰু সেই দেশৰ শীৰ্ষ সামৰিক নেতৃত্বৰ সৈতে মতবিনিময় কৰে ।
উল্লেখ যে ১৯৭১ চনৰ যুদ্ধত পাকিস্তানৰ সেনা পৰাজিত হৈছিল আৰু বাংলাদেশৰ পৰা বাহিৰ কৰি দিয়া হৈছিল লগতে ৯০ হাজাৰ সৈনিকক আত্মসমৰ্পনৰ বাবে বাধ্য কৰোৱা হৈছিল । যাৰ বাবে ভাৰত আৰু বাংলাদেশে যুদ্ধৰ সোণালী জয়ন্তী উদযাপন কৰাৰ লগতে বিভিন্ন কাৰ্যসূচী ৰূপায়ণ কৰিছে ।
