নেশ্যনেল ডেস্ক,২০ আগষ্ট : হিমাচল প্ৰদেশত প্ৰকৃতিৰ ধ্বংসলীলা অব্যাহত আছে । যোৱা ১৪ আগষ্টত হিমাচল প্ৰদেশৰ চিমলাৰ ছামাৰ হিলত হোৱা শোকাৱহ ভূমিস্খলনৰ পাছত নিৰাপত্তা বাহিনী আৰু দুৰ্যোগ সাহায্য বাহিনীয়ে একেৰাহে সপ্তম দিনাও অনুসন্ধান অভিযান অব্যাহত ৰাখিছে । ইফালে ভূমিস্খলনত মন্দিৰ খহি পৰাৰ ফলত মৃত্যু হোৱাৰ লোকৰ সংখ্যাও বৃদ্ধি পাইছে । উদ্ধাৰকাৰী দলে দেওবাৰে পুনৰ এটা মৃতদেহ উদ্ধাৰ কৰিছে । ইয়াৰ লগে লগে ঘটনাটোত মৃত্যু হোৱাৰ লোকৰ সংখ্যা ১৭ লৈ বৃদ্ধি পাইছে । এতিয়াও ৩ জন লোক সন্ধানহীন হৈ থকা বুলি জানিব পৰা গৈছে । ঘটনাস্থলীত এছডিআৰএফ, এনডিআৰএফ আৰু ভাৰতীয় সেনাৰ দলে নিৰন্তৰভাৱে অভিযান চলাই আছে ।
চিমলা পৌৰ নিগমৰ ছামাৰ হিল ৱাৰ্ডৰ এগৰাকী স্থানীয় বিষয়াই জনোৱা মতে কঠোৰ প্ৰত্যাহ্বানৰ পাছতো উদ্ধাৰকাৰী দলে অনুসন্ধান অভিযান চলাই আছে । উদ্ধাৰ প্ৰচেষ্টাৰ বাবে অনা যন্ত্ৰবোৰ স্থানটোৰ তললৈ যাব পৰা নাই বুলিও উল্লেখ কৰিছে বিষয়াগৰাকীয়ে ।
উল্লেখ্য যে ১৪ আগষ্টত ভূমিস্খলনৰ ফলত ছামাৰ হিলৰ প্ৰাচীন শিৱবাৰী মন্দিৰ খহি পৰিছিল । য'ত বহু লোক আৱদ্ধ হৈ পৰিছিল । জিলা আৰক্ষী, সেনা, এছডিআৰএফ, এনডিআৰএফ আৰু খণ্ডসমূহত নিয়োজিত অগ্নি নিৰ্বাপক বাহিনীৰ যুটীয়া দলে একেৰাহে অভিযান চলাই আৰু এতিয়ালৈ ১৭ গৰাকী লোকৰ মৃতদেহ উদ্ধাৰ কৰিছে ।
