নিউজ ডেস্ক, ৬ জুলাই : দিল্লীত সুৰা কেলেংকাৰীৰ অভিযোগত কাৰাবন্দী প্ৰাক্তন উপ-মুখ্যমন্ত্ৰী মণীষ ছিছোডিয়াই জামিনৰ বাবে উচ্চতম ন্যায়ালয়ৰ কাষ চাপিছে । বৃহস্পতিবাৰে দিল্লী উচ্চ ন্যায়ালয়ে জামিন মঞ্জুৰ নকৰাৰ সিদ্ধান্তক প্ৰত্যাহ্বান জনাই তেওঁ এক আবেদন দাখিল কৰিছে । উল্লেখ্য, ৩ জুলাইত উচ্চ ন্যায়ালয়ে ছিছোডিয়াৰ জামিন অস্বীকাৰ কৰি কৈছিল যে তেওঁ ৰাজ্যখনত এক শক্তিশালী পদত অধিষ্ঠিত আছিল । কাৰাগাৰৰ পৰা ওলাই অহাৰ পিছত তেওঁ সাক্ষীসকলক প্ৰভাৱিত কৰাৰ সম্ভাৱনা নুই কৰিব নোৱাৰি ।
ইডিৰ ক্ষেত্ৰতো উচ্চ ন্যায়ালয়ে মঙলবাৰে ছিছোডিয়াৰ জামিন আবেদন নাকচ কৰিছিল । অৱশ্যে ইয়াৰ আগতে মে' মাহত চিবিআয়ে গোচৰটোৰ জামিন আবেদন নাকচ কৰিছিল । বিচাৰ আদালতে (ৰাউজ এভিনিউ) এপ্ৰিলত আবেদনখন খাৰিজ কৰিছিল ।
বৃহস্পতিবাৰে পুৱা ৰাউজ এভিনিউ আদালতে ভিডিঅ' কনফাৰেন্সৰ জৰিয়তে ছিছোডিয়াক আদালতত হাজিৰ কৰাবৰ বাবে দিল্লী আৰক্ষীৰ দাবী নাকচ কৰে । আপ নেতাজনৰ অধিবক্তাই যুক্তি দিছিল যে কাৰ্যকৰী শুনানিৰ বাবে সোঁশৰীৰে উপস্থিত হোৱাৰ তেওঁৰ অধিকাৰ আছে । আদালতত হাজিৰ হোৱাৰ অধিকাৰৰ পৰা বঞ্চিত কৰিব নালাগে । আদালতে ইয়াত সন্মতি দিয়ে ।
উল্লেখ্য, দিল্লীৰ নতুন আবকাৰী নীতিৰ এক কেলেংকাৰীৰ সন্দৰ্ভত দীৰ্ঘদিন ধৰি সোধা-পোচা কৰাৰ অন্তত ছিছোডিয়াক চিবিআয়ে ২৬ ফেব্ৰুৱাৰীত গ্ৰেপ্তাৰ কৰিছিল । তেতিয়াৰে পৰা তেওঁ তিহাৰ কাৰাগাৰত আছে । পিছত কাৰাগাৰতে ইডিয়ে তেওঁক ইয়াৰ সৈতে সম্পৰ্কিত ধন আত্মসাতৰ গোচৰত সোধা-পোছা কৰে আৰু ৯ মাৰ্চত তেওঁক গ্ৰেপ্তাৰ কৰে । তাৰ মাজতে উচ্চ ন্যায়ালয়ে ছিছোডিয়াক এদিনৰ বাবে পুৱা ১০ বজাৰ পৰা সন্ধিয়া ৫ বজালৈ তেওঁৰ পত্নীক লগ কৰিবলৈ অনুমতি দিছিল । তেওঁ যোৱা মাহত দিল্লী আৰক্ষীৰ কঠোৰ নিৰাপত্তাৰ অধীনত তেওঁৰ পত্নীক লগ কৰিছিল । সেই সময়ত তেওঁৰ পত্নীয়ে ছ'চিয়েল মিডিয়াত তেওঁৰ বেদনা প্ৰকাশ কৰি এখন পত্ৰও প্ৰকাশ কৰিছিল ।
