নেশ্যনেল ডেস্ক,২০ আগষ্ট : প্ৰকৃতিৰ ৰোষত পৰিছে উত্তৰাখণ্ড । ডাৱৰ বিস্ফোৰণৰ পাছত ৰাজ্যজুৰি ধাৰাসাৰ বৰষুণ (Heavy rain in Uttarakhand)। বিগত প্ৰায় ২৪ ঘণ্টা ধৰি হোৱা বৰষুণৰ ফলত ডেৰাডুন চং নদীৰ জলপৃষ্ঠ বৃদ্ধি হৈছে । নৈৰ বাঢ়নি পানীয়ে বুৰাই পেলাইছে ৰাজ্যখনৰ বিভিন্ন অঞ্চল ।
উল্লেখ্য যে ডেৰাডুন মালদেৱতা অঞ্চলত ডাৱৰ বিস্ফোৰণৰ ঘটনা সংঘটিত হয় (Cloud burst in Dehradun Maldevta)। লগে লগে ঘটনাস্থলীত জিলা প্ৰশাসন আৰু এছডিআৰএফৰ দল উপস্থিত হৈ উদ্ধাৰ অভিযান আৰম্ভ কৰিছে । ইফালে ৰাজ্যখনৰ বিস্তীৰ্ণ অঞ্চল ক্ষতিগ্ৰস্ত হোৱা বুলি জানিব পৰা গৈছে । অৱশ্যে, এতিয়ালৈকে কোনো প্ৰাণহানিৰ খবৰ পোৱা হোৱা নাই ।
একে সময়তে, মুখ্যমন্ত্ৰী পুষ্কৰ সিং ধামীয়ে (CM Pushkar Singh Dhami) ৰাজ্যখনৰ বিভিন্ন স্থানত ধাৰাসাৰ বৰষুণ আৰু ইয়াৰ ফলত হোৱা ক্ষয়-ক্ষতিৰ বুজ লৈছে ।
এক অবৰ্ণনীয় পৰিৱেশৰ সৃষ্টি হৈছে ৰাজ্যখনৰ বিভিন্ন অঞ্চলত । এনে পৰিস্থিতিৰ মাজতো ইটিভি ভাৰতৰ সাংবাদিক উপস্থিত হৈছে অঞ্চলটোত (ETV Bharat Ground Report from Dehradun)। ইটিভি ভাৰতৰ কেমেৰাত বন্দী হৈছে প্ৰাকৃতিক দুৰ্যোগৰ ভয়ংকৰ ছবিবোৰ ।
ৰাজপথৰ বাহন, ঘৰ-দুৱাৰ আদিত পানী সোমাইছে । নৈৰ সোঁত ইমান তীব্ৰ হৈছে যে ই গছ-গছনি উভালি পেলাইছে । ধাৰাসাৰ বৰষুণৰ ফলত মালদেৱতাৰ মূল পথ বন্ধ হৈ পৰিছে । এছডিআৰএফৰ বাহনো পথত আৱদ্ধ হৈ থকা দেখা গৈছে । যাৰ বাবে উদ্ধাৰকাৰী দলটো বাহনৰ পৰা নামি খোজ কাঢ়ি আগবাঢ়ি গৈছে ।
ডাৱৰ বিস্ফোৰণৰ পাছত চাৰখেত নামৰ গাঁওখনৰ বহু লোকৰ ঘৰত পানী সোমাইছে । ইফালে গাঁওখনত আৱদ্ধ লোকসকলক এছডিআৰএফৰ দলে উদ্ধাৰ কৰি সুৰক্ষিত ঠাইলৈ স্থানান্তৰ কৰিছে । আনহাতে একাংশ লোকে ৰিজৰ্টত আশ্ৰয় লৈ আছে ।
কেবিনেট মন্ত্ৰী গণেশ যোশীয়ে ডাৱৰ বিস্ফোৰণৰ খবৰ পোৱাৰ লগে লগে গাঁওখনত উপস্থিত হয় । ইফালে ৰাজ্যখনৰ মুখ্যমন্ত্ৰী পুষ্কৰ সিং ধামীয়ে লোকসকলক কোনো প্ৰয়োজনীয় কাৰণ নহ'লে উক্ত অঞ্চললৈ ভ্ৰমণ ত্যাগ কৰিবলৈ আহ্বান জনাইছে আৰু নদীৰ নলাবোৰৰ পৰা আঁতৰি থাকিবলৈ অনুৰোধ জনাইছে । আনহাতে মুখ্যমন্ত্ৰীয়ে সকলো বিভাগকে পৰিস্থিতি পৰ্যৱেক্ষণৰ বাবে নিৰ্দেশনা জাৰি কৰিছে ।
লগতে পঢ়ক :ডাৱৰ বিস্ফোৰণৰ ফলত ডেৰাডুনত হাহাকাৰ
