নেশ্যনেল ডেস্ক, 22 মাৰ্চ : আগৰতলাত ড্ৰাগছৰ বিৰুদ্ধে আৰক্ষীৰ তৎপৰতা বৃদ্ধি পোৱাৰ সময়তে দেওবাৰৰ দিনা কুখ্যাত ড্ৰাগছ মাফিয়া নাহিদ মিয়াক তেওঁৰ বাসগৃহৰ পৰা আটক কৰে আৰক্ষীয়ে ৷ SDPO ৰমেশ যাদৱৰ নেতৃত্বত যোৱা এক আৰক্ষীৰ দলে নাহিদৰ বাসগৃহত তালাছী চলাই প্ৰায় 10-12 লাখ টকাৰ নিচাজাতীয় সামগ্ৰী জব্দ কৰাৰ লগতে নাহিদ মিয়াক আটক কৰিবলৈ সক্ষম হয় ৷
SDPO ৰমেশ যাদৱৰ মতে, আগৰতলাত তিনি ড্ৰাগছ সৰবৰাহকাৰীক চিনাক্ত কৰা হৈছে - নাহিদ মিয়া, ৰাজু দাস আৰু গেহনা ৷ এই তিনিওজনৰ নেতৃত্বতে আগৰতলা চহৰত ড্ৰাগছৰ সৰবৰাহ কৰা হয় ৷ আৰক্ষীৰ অভিযানত ৰাজু আৰু গেহনাই পলাই হাৰিবলৈ সক্ষম হয় যদিও নাহিদক আৰক্ষীয়ে আটক কৰিবলৈ সক্ষম হয় ৷
এমজিএম বজাৰৰ পৰা তিনিওজনে ড্ৰাগছৰ সৰবৰাহ কৰি আহিছিল ৷ বহু সময়ত তেওঁলোকে সীমান্ত পাৰ হৈ বাংলাদেশত প্ৰৱেশ কৰে ৷ তেওঁলোকে বাংলাদেশৰ পৰাও ড্ৰাগছ আমদানি কৰে বুলি সন্দেহ কৰা হৈছে ৷
আৰক্ষীয়ে 92,000 টকাৰ নগদ ধন, আঠটাকৈ মোবাইল ফোন, এখন কেটিএম মটৰ চাইকেল, এখন স্কুটি, 470 ব্ৰাউন ছুগাৰ, তিনিখন পাছপৰ্ট আৰু অন্যান্য সামগ্ৰী জব্দ কৰে৷ এক সূত্ৰই জানিবলৈ দিয়া অনুসৰি, তালাছীৰ বাবে যোৱা আৰক্ষীৰ ওপৰত নাহিদে আক্ৰমণৰ চেষ্টা চলাইছিল ৷
লগতে পঢ়ক : জলেশ্বৰ সমষ্টিত এইবাৰ ব্যতিক্ৰমী প্ৰাৰ্থী
