নেচনেল ডেস্ক, 7 ডিচেম্বৰ: বিবাহৰ দিনটোতে ক'ভিড-19 ত আক্ৰান্ত হ'ল শ্বাহবাদৰ বাৰাৰ এগৰাকী কইনা ৷ কইনা ক'ভিড- 19 ত আক্ৰান্ত হোৱাৰ ৰিপৰ্ট বিবাহৰ দিনটোতে অহাৰ পাছতে দৰা কইনা দুয়ো পি পি ই কিট পৰিধান কৰি বিবাহ মণ্ডপত বহে ৷
জানিব পৰা মতে কইনা গৰাকী ক'ভিড-19 আক্ৰান্ত হোৱাত আৰক্ষী আহি বিবাহথলীত উপস্থিত হয় আৰু কইনাক ক'ভিড কেন্দ্ৰলৈ প্ৰেৰণ কৰে ৷ ইয়াৰ পাছতে জিলা উপায়ুক্তৰ সৈতে তথা প্ৰশাসনৰ সংশ্লিষ্ট বিষয়াবৰ্গৰ সৈতে আলোচনাত মিলিত হৈ ক'ভিড কেন্দ্ৰতে বিবাহ অনুষ্ঠিত কৰাৰ সিদ্ধান্ত গ্ৰহণ কৰা হয় ৷ সেই মৰ্মে ৰাজস্থানৰ শ্বাহবাদৰ বাৰাৰ কেলৱাৰা ক'ভিড কেন্দ্ৰত বিবাহকাৰ্য সম্পন্ন হয় ৷
ক'ভিড কেন্দ্ৰতে দৰা কইনাই পিপিই কিট পৰিধান বিয়াত বহাৰ এই ঘটনাই ইতিমধ্যে চৰ্চা লাভ কৰিছে ৷ উল্লেখ্য যে প্ৰশাসনৰ নিয়ম মানি সম্পূৰ্ণ ক'ভিড অধিনিয়মৰ মাজেৰে দৰা কইনাৰ পিতৃ মাতৃ তথা প্ৰশাসনৰ লোকৰ উপস্থিতিত এই বিবাহকাৰ্য সম্পন্ন হয় ৷
লগতে পঢ়ক:ৰাম মন্দিৰৰ বাবে সংগৃহীত অনুদানৰ হিচাপ বিচাৰিলে কংগ্ৰেছে
