নেশ্যনেল ডেস্ক, ৭ ছেপ্তেম্বৰ : সাধাৰণ জনতা আৰু চৰকাৰৰ মাজৰ ব্যৱধান কম কৰাৰ উদ্দেশ্যে ত্ৰিপুৰাত আৰম্ভ কৰা হৈছে 'মুখ্যমন্ত্ৰী হেল্পলাইন সেৱা' । সোমবাৰে ত্ৰিপুৰাৰ মুখ্যমন্ত্ৰী বিপ্লৱ কুমাৰ দেৱে 'মুখ্যমন্ত্ৰী হেল্পলাইন সেৱা'ৰ শুভাৰম্ভ কৰে । মাত্ৰ ১৯০৫ নম্বৰত ফোন কৰি নিজৰ সমস্যাৰ বিষয়ে ৰাইজে বিভাগীয় কৰ্তৃপক্ষক জনাব পাৰিব । জনসাধাৰণৰ অভিযোগ নিষ্পত্তিৰ প্ৰক্ৰিয়া ত্বৰান্বিত কৰিবলৈ এই পদক্ষেপ গ্ৰহণ কৰিছে ত্ৰিপুৰা চৰকাৰে ।
'মুখ্যমন্ত্ৰী হেল্পলাইন সেৱা'ৰ বাবে মুকলি কৰি দিয়া নম্বৰত ফোন কৰি চৰকাৰৰ বিভিন্ন নীতি উন্নত কৰাৰ সন্দৰ্ভত পৰামৰ্শ আগবঢ়াব পাৰিব ৰাইজে । মুখ্যমন্ত্ৰীৰ কাৰ্যালয়ে পোনপটীয়াকৈ সমগ্ৰ প্ৰক্ৰিয়া তদাৰক কৰিব আৰু সকলো ফাইল মুখ্যমন্ত্ৰীলৈ প্ৰেৰণ কৰা হ'ব । মুখ্যমন্ত্ৰী বিপ্লৱ কুমাৰ দেৱে সোমবাৰে কেৱল এই সেৱা উদ্বোধন কৰাই নহয়, তেওঁ জনসাধাৰণৰ সৈতে পোনপটীয়াকৈ কথাও পাতে । লগতে বিভাগীয় বিষয়াসকলক এই সন্দৰ্ভত প্ৰয়োজনীয় ব্যৱস্থা ল'বলৈ নিৰ্দেশ দিছিল ।
এই সন্দৰ্ভত এগৰাকী পৰ্যবেক্ষকে কয় যে, এই পদক্ষেপে নাগৰিক আৰু চৰকাৰৰ মাজৰ ব্যৱধান হ্ৰাস কৰিব আৰু চৰকাৰৰ নীতি প্ৰস্তুতকৰণত জনসাধাৰণৰ অংশগ্ৰহণ বৃদ্ধি কৰিব । আনহাতে, এগৰাকী উচ্চ পদস্থ চৰকাৰী বিষয়াই কয় যে, জনসাধাৰণক তেওঁলোকৰ অভিযোগ দাখিল কৰাৰ বাবে এখন মঞ্চ আগবঢ়োৱাৰ উদ্দেশ্যেৰে এই পদক্ষেপ লোৱা হৈছে ।
এই পদক্ষেপে শাসন ব্যৱস্থাৰ ওপৰত দীৰ্ঘম্যাদী প্ৰভাৱ পেলাব । কল চেণ্টাৰটো ইন্দ্ৰনগৰৰ আই টি ভৱনত স্থাপন কৰা হৈছে । 'মুখ্যমন্ত্ৰী হেল্পলাইন সেৱা' উদ্বোধন কৰি মুখ্যমন্ত্ৰীগৰাকীয়ে কয় যে, তেওঁ উন্নয়নক লৈ চলি থকা ৰাজনীতিৰ সমাপ্তি ঘটাব বিচাৰে । তেওঁ কয় যে, তেওঁ দুজন লোকৰ সৈতে কথা পাতিছে ।
ৰাণীৰবজাৰৰ পৰা এজন লোকে আৰু ইন্দ্ৰনগৰৰ পৰা আন এজন ব্যক্তিয়ে ফোন কৰিছিল । মুখ্যমন্ত্ৰীয়ে তেওঁলোকৰ সৈতে কথা পাতে । তেওঁৰ মতে, ৰাজনীতি নিৰ্বাচনৰ সময়লৈকে সীমাবদ্ধ থাকিব লাগে আৰু তাৰ পিছত ৰাইজৰ স্বাৰ্থত চৰকাৰে কাম কৰা উচিত ।
লগতে পঢ়ক: আত্মহত্যাৰ বাবে প্ৰৰোচনা : আৰক্ষীৰ জিম্মালৈ প্ৰেৰণ টিএমচি নেত্ৰীক
