নেশ্যনেল ডেস্ক,১৭ মে' : দিল্লী-জয়পুৰ ঘাইপথত ভয়ংকৰ পথ দুৰ্ঘটনা (Accident at Delhi Jaipur road)। হাৰিয়ানাৰ জয়পুৰ জিলাত সংঘটিত এই দুৰ্ঘটনাত পাঁচগৰাকী লোকৰ মৃত্যু (5 killed in Jaipur accident)। আনহাতে দুৰ্ঘটনাটোত ১০ৰো অধিক লোক আহত হোৱাৰ খবৰ পোৱা গৈছে । দুখন বাহনৰ মাজত হোৱা সংঘৰ্ষৰ ফলতে এই শোকাৱহ দুৰ্ঘটনাটো সংঘটিত হয় ।
জানিব পৰা মতে, জয়পুৰ জিলাৰ চামোদ গাঁৱৰ এটা পৰিয়ালে সোমবাৰে পুৱাই হৰিদ্বাৰ ভ্ৰমণ কৰিবলৈ গৈছিল । বাহনখনত পৰিয়াল আৰু আত্মীয়সহ মুঠ ১৭ গৰাকী লোক আছিল । কিন্তু তেওঁলোকৰ ক্ৰুইজাৰ বাহনখনে উভতি অহাৰ সময়তে ওধি কাটৰ ওচৰত পুৱা প্ৰায় ৬ মান বজাত এখন ট্ৰাকত খুন্দা মাৰে । ফলত এই দুৰ্ঘটনাটোত নিহত হয় পৰিয়ালটোৰ ৫ গৰাকীকৈ লোক ।
মৃত ব্যক্তিসকল ক্ৰমে ভানুৰাম, মহেন্দ্ৰ, আশীষ, চুগমা দেৱী, আৰু ভোৰী দেৱী আছিল বুলি জানিব পৰা গৈছে । ঘটনাটোৰ পিছতে ট্ৰাক চালকসহ দুজন লোক ঘটনাস্থলীৰ পৰা পলায়ন কৰে । ইফালে আহতসকলক ততালিকে চিকিৎসালয়ত ভৰ্তি কৰোৱা হয় । তেওঁলোকৰ কিছুমানক ব্যক্তিগত চিকিৎসালয়ত ভৰ্তি কৰোৱা হৈছে বুলিও জানিব পৰা গৈছে ।
ভৱল আৰক্ষী থানাৰ আৰক্ষী বিষয়াৰ মতে এই দুৰ্ঘটনাৰ পাছতে ঘটনাস্থলীত তীব্ৰ আতংকৰ সৃষ্টি হয় । ৰাজপথত হুলস্থূলৰ সৃষ্টি হয় । সমান্তৰালকৈ আৰক্ষীয়ে আহত লোকসকলক ততালিকে হাস্পতাললৈ প্ৰেৰণ কৰে ।
