নিউজ ডেস্ক, ১০ নৱেম্বৰ : বৃহস্পতিবাৰে জম্মুৰ আন্তঃৰাষ্ট্ৰীয় সীমান্তত পাকিস্তানী ৰেঞ্জাৰৰ অপ্ৰৰোচিত গুলীচালনাত শ্বহীদ হোৱা সীমান্ত সুৰক্ষা বাহিনীৰ (বিএছএফ) হেড কনিষ্টবল লাল ফাম কীমা এগৰাকী নিৰ্ভীক সৈনিক আছিল । তেওঁ এসময়ত জম্মু-কাশ্মীৰৰ নিয়ন্ত্ৰণ ৰেখাৰ ওচৰত এক সন্ত্ৰাসবাদবিৰোধী অভিযানৰ সময়ত তেওঁৰ কেইবাজনো সতীৰ্থৰ প্ৰাণৰক্ষা কৰিছিল । জম্মু-কাশ্মীৰত ১৯৯৮ চনৰ শীতকালৰ সময়ত এক অভিযানৰ সময়ত গুলগাঁৱত এটা কেঁচাঘৰত লুকাই থকা এটা সন্ত্ৰাসবাদীক তেওঁৰ লাইট মেচিন গানেৰে (এলএমজি) নিধন কৰিছিল ।
উক্ত অভিযানৰ কথা মনত পেলাই কীমাৰ তদানীন্তন কমাণ্ডিং অফিচাৰে (চিঅ') এটা আৱেগিক পোষ্ট লিখিছে । উক্ত পোষ্টটো বিএছএফৰ কেইবাজনো বিষয়াই নিজৰ ছ'চিয়েল মিডিয়া প্লেটফৰ্মত শ্বেয়াৰ কৰিছে । উল্লেখ্য যে বৃহস্পতিবাৰে ভাৰত-পাক আন্তঃৰাষ্ট্ৰীয় সীমান্তৰ জম্মুৰ ৰামগড় ছেক্টৰত পাকিস্তানী ৰেঞ্জাৰৰ অপ্ৰৰোচিত গুলীচালনাত ৫০ বছৰীয়া কীমা শ্বহীদ হয় । মিজোৰামৰ আইজলৰ বাসিন্দা হেড কনিষ্টবল কীমাই ১৯৯৬ চনত সীমান্ত সুৰক্ষা বাহিনীত যোগদান কৰিছিল আৰু বৰ্তমান বিএছএফৰ ১৪৮ নম্বৰ বেটেলিয়নত কৰ্মৰত আছিল । তেওঁক আন্তঃৰাষ্ট্ৰীয় সীমান্ত ৰক্ষাৰ দায়িত্ব দিয়া হৈছিল ।
কীমাৰ এগৰাকী পূৰ্বৰ চিঅ' সুখমিন্দৰে (পোষ্টটোত কেৱল প্ৰথম নামটো উল্লেখ কৰা হৈছে) তেওঁক স্মৰণ কৰি কয় যে যেতিয়া তেওঁ সীমান্তত এগৰাকী বিএছএফ জোৱানৰ মৃত্যুৰ খবৰ শুনিছিল, তেতিয়া তেওঁৰ পুৰণি সহকৰ্মীগৰাকী এই অপ্ৰৰোচিত গুলীচালনাত নিহত হোৱাৰ ভয়ত তেওঁৰ মনটো অস্থিৰ হৈ পৰিছিল । প্ৰাক্তন চিঅ'গৰাকী কয় যে তেওঁ বিগত কেইবা বছৰ ধৰি যুৱ বিষয়া আৰু সৈনিকসকলক 'প্ৰায় ২৫ বছৰ পূৰ্বে এলঅ'চিত এক অভিযানৰ সময়ত কীমাই দেখুওৱা সাহসিকতা আৰু সতৰ্কতাৰ কাহিনী' কৈ আহিছে ।
পোষ্টটোত উল্লেখ কৰা হৈছে যে সন্ত্ৰাসবাদী এটা মাটিৰ ঘৰৰ ভিতৰত লুকাই আছিল আৰু নিৰাপত্তাৰক্ষীৰ সৈতে সংঘৰ্ষৰ পিছত তেওঁলোক আত্মঘাতী হৈছিল, যাতে ওচৰত উপস্থিত থকা বিএছএফৰ জোৱানসকলকো হত্যা কৰিব পৰা যায় । পোষ্টটোত উল্লেখ কৰা অনুসৰি, ঘৰটোৰ ভিতৰৰ পৰা ধোঁৱা ওলাইছিল আৰু বিএছএফৰ দলটোৱে তাত প্ৰৱেশ কৰাৰ সময়ত তিনিটা সন্ত্ৰাসবাদীক মৃত অৱস্থাত পাইছিল । পোষ্টটোত প্ৰাক্তন চিঅ'গৰাকীয়ে কয় যে সেই সময়ত হঠাতে এটা ডাঙৰ চিঞৰ শুনা গৈছিল । 'তুম ছালা পিন নিকালেগা' বুলি চিঞৰ শুনাৰ পিছতে এলএমজিৰ পৰা গুলীবৰ্ষণ হৈছিল আৰু সকলোৱে নিজকে বচাবলৈ লুকাবলৈ আৰম্ভ কৰিছিল ।
প্ৰাক্তন চিঅ'গৰাকীয়ে লগতে লিখিছে, "বন্দুক চলোৱাজন লাল ফাম কীমাৰ বাহিৰে আন কোনো নাছিল । প্ৰকৃততে মাটিৰ ঘৰটোত হোৱা বিস্ফোৰণৰ পিছত যেতিয়া বাকী সৈন্যসকল অনুসন্ধানত ব্যস্ত আছিল, কীমা সচৰাচৰৰ দৰে সতৰ্ক হৈ আছিল আৰু সকলো গতিবিধিৰ ওপৰত নজৰ ৰাখিছিল । তেওঁৰ সতৰ্কতাৰ বাবেই তেওঁ সন্ত্ৰাসবাদীজনক গ্ৰেনেডৰ পৰা পিনটো উলিয়াই থকা দেখিছিল ।
প্ৰাক্তন চিঅ'গৰাকীৰ মতে, যদি সন্ত্ৰাসবাদীয়ে পিনটো আঁতৰাবলৈ সক্ষম হ'লহেঁতেন, তেন্তে কেইবাজনো সৈন্যই প্ৰাণ হেৰুৱালেহেঁতেন আৰু এক সফল অভিযানৰ বাবে কৰা সকলো কঠোৰ পৰিশ্ৰম মাটিত মিহলি হৈ গ'লহেঁতেন ।
লগতে পঢ়ক :Jitan Ram Manjhi on Nitish Kumar : নীতিশ কুমাৰক খাদ্যত বিষাক্ত পদাৰ্থ দিয়া হৈছে; জিতন ৰাম মাঝি
