নিউজ ডেস্ক, ৪ জানুৱাৰী : লোকসভা নিৰ্বাচনৰ পূৰ্বে নিজৰ ভাবমূৰ্তি কলুষিত কৰাৰ চেষ্টা কৰাৰ বাবে বিজেপিক তীব্ৰ আক্ৰমণ কৰে কেজৰিৱালে । দিল্লীৰ মুখ্যমন্ত্ৰী অৰবিন্দ কেজৰিৱালে বৃহস্পতিবাৰে এক ভিডিঅ' বাৰ্তাত তেওঁৰ সততাৰ কথা পুনৰবাৰে দোহাৰে । আনহাতে, তেওঁৰ মুখ বন্ধ কৰাৰ বাবে চলোৱা কেন্দ্ৰৰ শাসন ব্যৱস্থাক তীব্ৰ সমালোচনা কৰে ।
তেওঁ কয়, "লোকসভা নিৰ্বাচনৰ পূৰ্বে বিজেপি মোৰ পিছত লাগি আছে আৰু মোক গ্ৰেপ্তাৰ কৰিব বিচাৰে ।"
উল্লেখ্য যে আপৰ ৰাষ্ট্ৰীয় আহ্বায়কগৰাকীয়ে দিল্লীৰ আবকাৰী নীতি কেলেংকাৰীৰ গোচৰৰ তৃতীয়টো চমনো এৰাই যায় আৰু ইডিৰ জাননীক অবৈধ আৰু ৰাজনৈতিকভাৱে উদ্দেশ্যপ্ৰণোদিত বুলি অভিহিত কৰে ।
আনহাতে, কাৰাগাৰত থকা তেওঁৰ দলৰ সহকৰ্মীসকলৰ সন্দৰ্ভত বক্তব্য ৰাখি আপৰ আহ্বায়কগৰাকীয়ে কয় যে সৎ নেতাসকলে আক্ৰমণৰ সন্মুখীন হৈছে । কাৰণ তেওঁলোকে গেৰুৱা দলত যোগদান কৰিবলৈ অস্বীকাৰ কৰিছে । কেজৰিৱালে এই পদক্ষেপক 'মুক্ত গুণ্ডাগিৰি' বুলি অভিহিত কৰি দাবী কৰে যে চমনবোৰ অবৈধ আৰু ৰাজনৈতিকভাৱে উদ্দেশ্যপ্ৰণোদিত ।
ইফালে গোচৰটোত কাৰাগাৰত থকা তেওঁৰ দলৰ সহকৰ্মী মনীষ ছিছোডিয়া আৰু সঞ্জয় সিঙৰ বিষয়ে বিতংভাৱে বৰ্ণনা কৰি কেজৰিৱালে বিজেপিৰ হেঁচাত আপোচ নকৰা আৰু তেওঁলোকৰ নিৰন্তৰ প্ৰচেষ্টাৰ বাবে দুয়োকে প্ৰশংসা কৰে ।
