নিউজ ডেস্ক,21 অক্টোবৰঃ " ঘৰলৈ উভতি অহাৰ প্ৰতিশ্ৰুতি দিছিল তেখেতে, কিন্তু উভতি আহিল তেওঁৰ নশ্বৰ দেহ " ৷
সোমবাৰে দিল্লীস্থিত পালম বিমান বন্দৰত ভাৰতীয় সেনাই অন্তিম শ্ৰদ্ধাঞ্জলি জ্ঞাপন কৰে শ্বহীদ পাদম বাহাদুৰ শ্ৰেষ্ঠ আৰু ৰাইফলমেন গামিল কুমাৰ শ্ৰেষ্ঠক ৷ দেওবাৰে ভাৰত-পাকিস্তানৰ লাইন অফ কন্ট্ৰলৰ টাংধাৰ ক্ষেত্ৰত হোৱা গুলিয়াগুলীত শ্বহীদ হৈছিল দুয়োগৰাকী ভাৰতীয় সেনাৰ বীৰ জোৱান ৷ দুয়োগৰাকী বীৰ জোৱান ভাৰতীয় সেনাৰ গোৰ্খা ৰাইফলছৰ সৈনিক আছিল ৷
ভাৰতীয় সেনাৰ উপ সেনাধক্ষ্য এম এম নাৰাৱেনেৰ লগতে বহু কেইজন উচ্চস্তৰীয় বিষয়া উপস্থিত আছিল শেষ শ্ৰদ্ধাঞ্জলি অনুষ্ঠানত ৷ শেষ শ্ৰদ্ধাঞ্জলি অনুষ্ঠানৰ পাচতেই নিজ নিজ বাসগৃহলৈ প্ৰেৰণ কৰা হয় দুয়োগৰাকী শ্বহীদৰ নশ্বৰ দেহ ৷
উল্লেখ্য যে, দেওবাৰে ভাৰত-পাকিস্তানত সীমান্তত পাকিস্তানী সেনাই যুদ্ধ বিৰতি উলংঘা কৰিছিল ৷ মুখ্যতঃ অসামৰিক লোকক উদ্দেশ্যে কৰি চলোৱা পাকিস্তানী সেনাৰ আক্ৰমণত এগৰাকী ব্যক্তি নিহত হোৱাৰ লগতে তিনিগৰাকী গুৰুতৰভাৱে আঘাত প্ৰাপ্ত হয় ৷ প্ৰত্যুত্তৰত ভাৰতীয় সেনাৰ আক্ৰমণত পাকিস্তান অধিকৃত কাশ্মীৰৰ কেইবাটাও সন্ত্ৰাসবাদৰ ঘাটি উচ্চেদ কৰে ৷ লগতে প্ৰায় 6 ৰ পৰা 10 জন পাকিস্তানী সৈনিক নিহত হয় ভাৰতীয় সেনাৰ আক্ৰমণত ৷
