নিউজ ডেস্ক,২জুলাই: ক'ৰণা ভাইৰাচৰ লগতে সমানে যুঁজ দিব পৰাকৈ শৰীৰৰ ৰোগ প্ৰতিৰোধ ক্ষমতা বৃদ্ধি কৰাৰ প্ৰয়াসেৰে ত্ৰিপুৰাৰ চহৰাঞ্চলত জনসাধাৰণৰ মাজত ভিটামিন-C সমৃদ্ধ ফলমূল বিতৰণৰ ব্যৱস্থা কৰাৰ কথা সদৰি কৰিলে ৰাজ্যখনৰ মুখ্যমন্ত্ৰী বিপ্লৱ কুমাৰ দেৱে । '
মুখ্যমন্ত্ৰী ক'ৰণা প্ৰতিৰোধ অভিযান'ৰ অধীনত ইতিমধ্যে ত্ৰিপুৰা চৰকাৰে এক কোটি টকাৰ পুঁজি আবন্তনেৰে অহা ৪জুলাইৰ পৰা জনসাধাৰণৰ মাজত বিতৰণ কৰিব ফলমূল । ৰাজ্য চৰকাৰে বিতৰণ কৰিব লগা এই ফলমূল সমূহত থাকিব বিশেষকৈ আনাৰস আৰু নেমুটেঙা ।
ত্ৰিপুৰাৰ মুখ্যমন্ত্ৰীগৰাকীয়ে এটা ফেচবুক পষ্টৰ জড়িয়তে উল্লেখ কৰিলে, বিতৰণ কৰিব লগা এই ফলমূল সমূহ গাঁৱৰ কৃষকৰ পৰা পোনপটিয়াকৈ ক্ৰয়ৰ ফলত তেওঁলোক লাভান্বিত হ'ব । তাৰোপৰি "নেশ্যনেল আৰবান লাইভলিহ'ড মিশ্ব্যন"ৰ তত্বাৱধানত এই আঁচনিখন ৰূপায়ন কৰা হব ।
প্ৰতি শনিবাৰে দুপৰীয়া ১২ বজাৰ পৰা বিয়লি ৪বজালৈ চহৰাঞ্চল সমূহত স্থানীয় সামাজিক সংস্থা সমূহৰ জড়িয়তে এই ফলমূলসমূহ বিতৰণৰ ব্যৱস্থা কৰা হব।
উল্লেখ্য যে, ত্ৰিপুৰাত প্ৰতি বছৰত ১.২৮ টন আনাৰস উৎপাদন হৈ আহিছে । ত্ৰিপুৰাৰ ৰাণী খ্যাত বিভিন্ন প্ৰজাতিৰ এই আনাৰস ডুবাই, বাংলাদেশকে ধৰি বিশ্বৰ অন্যান্য প্ৰান্তলৈ ৰপ্তানি হৈ আহিছে । ইতিমধ্যে ৰাজ্যখনৰ উদ্যান শস্য বিভাগে আনাৰস যোগান ধৰিব লগা স্থান সমূহৰ লগতে আনাৰসৰ খেতিয়কৰ এখন তালিকা প্ৰস্তুত কৰি উলিয়াইছে যাৰ পৰা এই ফল শীঘ্ৰে সংগ্ৰহ কৰিবলৈ সুবিধা হয় ।
