নিউজ ডেস্ক, 22 এপ্ৰিলঃ সমগ্ৰ বিশ্বক কপাই তোলা শ্ৰীলংকাৰ ধাৰাবাহিক বিস্ফোৰণৰ আঁৰত আত্মঘাতী বোমাৰু আছিল ৷ এই কথা প্ৰকাশ কৰিছে দেশখনৰ চৰকাৰৰ এক শীৰ্ষ সূত্ৰই ৷ শ্ৰীলংকা চৰকাৰৰ এগৰাকী শীৰ্ষ বিষয়া এ ৱেলিংগাই স্থানীয় সংবাদ প্ৰতিষ্ঠান "দেইলি মিৰৰ"ৰ আগত প্ৰকাশ কৰা অনুসৰি সোমবাৰে সংঘটিত হোৱা ধাৰাবাহিক বিস্ফোৰণৰ আঁৰত আছিল আত্মঘাতী বোমাৰু ৷
দেশখনত সংঘটিত হোৱা বিস্ফোৰণৰ আগতীয়া সম্ভেদ চোৰাংচোৱাৰ হাতত আছিল ৷ সেই অনুসৰিয়ে চোৰাংচোৱা বিভাগে আৰক্ষী বিভাগৰ লগতে অন্যান্য সংশ্লিষ্ট বিভাগসমূহক সচেতন কৰিছিল ৷ কিন্তু পৰৱৰ্তী সময়ত এই বিষয়টো গুৰুত্ব সহকাৰে নলৈ এৰাই চলিছিল দেশখনৰ চোৰাংচোৱাকে ধৰি আৰক্ষী তথা অন্যান্য সংশ্লিষ্ট বিভাগসমূহে ৷ ইতিমধ্যে সমগ্ৰ ঘটনা সন্দৰ্ভত দেশখনৰ আৰক্ষীয়ে নিজাববীয়াকৈ অভিযান আৰম্ভ কৰিছে আৰু কি কাৰণত এনেকুৱা তথ্য এৰাই চলা হৈছিল সেই বিষয়ে তদন্ত আৰম্ভ কৰিছে ৷
বিস্ফোৰণৰ ফলত নিহতৰ সংখ্যা 290গৰাকীলৈ বৃদ্ধি পোৱাৰ লগতে আহতৰ সংখ্যা 500লৈ বৃদ্ধি পাইছে ৷ ঘটনা সন্দৰ্ভত দেশখনৰ আৰক্ষীয়ে বৰ্তমানলৈ 24গৰাকী লোকক আটক কৰিছে ৷ দেশখনৰ প্ৰধানমন্ত্ৰীৰ ভাষ্য অনুসৰি গ্ৰেপ্তাৰ হোৱা অধিকাংশ লোকেই স্থানীয় আৰু ইয়াৰ সৈতে কোনো বিদেশী শক্তি জড়িত হৈ আছে নে নাই সেই বিষয়ে সোধাপোচা অব্যাহত ৰাখিছে ৷
