নন-কনটেইনমেন্ট এলেকাত 20 এপ্ৰিলৰ পৰা প্ৰদান কৰা হ'ব কিছু শিথিলতা : স্বাস্থ্য মন্ত্ৰণালয়

নন-কনটেইনমেন্ট এলেকাত 20 এপ্ৰিলৰ পৰা কিছু শিথিলতা প্ৰদান কৰা হ'ব বুলি মন্তব্য আগবঢ়ায় লাভ আগৰৱালে ৷ আনহাতে, কঠোৰ নিৰ্দেশাৱলী অব্যাহত থাকিব হটস্পট এলেকাত ৷

নেশ্যনেল ডেস্ক,19 এপ্ৰিল : 20 এপ্ৰিলৰ পৰা নন কনটেইনমেন্ট এলেকাত কিছু শিথিলতা প্ৰদান কৰাৰ লগতে COVID-19 ৰ হটস্পট হিচাপে গণ্য কৰা এলেকাসমূহত কঠোৰ নিৰ্দেশনা পূৰ্বৰ দৰেই বাহাল থাকিব বুলি দেওবাৰে জানিবলৈ দিয়ে চৰকাৰে ৷

কৰ'ণা ভাইৰাছ সম্পৰ্কত দৈনিক কাৰ্যাৱলীৰ বিৱৰণ দি স্বাস্থ্য মন্ত্ৰণালয়ৰ যুটীয়া সচিব লাভ আগৰৱালে কয় যে, কৃষিখণ্ড আৰু গ্ৰামাঞ্চলৰ অৰ্থনীতিৰ সৈতে জড়িত কিছুসংখ্যক কৰ্মৰ বাবে অনুমতি প্ৰদান কৰা হৈছে ৷ তেওঁ লগতে কয় যে, দেওবাৰে প্ৰতিষেধক আৰু ঔষধৰ পৰীক্ষণ সন্দৰ্ভত বিজ্ঞানৰ সৈতে জড়িত উচ্চস্তৰীয় বিষয়াৰে এটা দল গঠন কৰা হৈছে ৷

এই দলটোত আছে Niti Aayog ৰ সদস্য, চৰকাৰৰ মুখ্য বিজ্ঞান উপদেষ্টা, AYUSH, ICMR, Department of Science and Technology, Biotechnology, CSIR, DRDO, DG Health Services আৰু Drug Controller ৷

যোৱা 24 ঘন্টাত দেশত নতুনকৈ আক্ৰান্ত হৈছে 1,334 জন আৰু মৃত্যু হৈছে 27 জনৰ ৷ বৰ্তমানলৈকে ভাৰতত 507 জন লোকৰ মৃত্যু হোৱাৰ লগতে আক্ৰান্ত হৈছে 15,712 জন ৷ ইয়াৰোপৰি, 14.19 শতাংশ অৰ্থাৎ 2,231 জন ৰোগী সুস্থ হৈ উঠিছে ৷