নিউজ ডেস্ক, 22 অক্টোবৰ: প্ৰতিৰক্ষা আৰু সুৰক্ষা ক্ষেত্ৰত এক ভাবুকিৰ সৃষ্টি কৰিছে ড্ৰ'ণে ৷ শেহতীয়াকৈ চৌদি আৰবৰ তৈলক্ষেত্ৰত ড্ৰ'ণেৰে কৰা আক্ৰমণে সমগ্ৰ বিশ্বক স্তম্ভিত কৰিছে ৷ ইয়াৰ উপৰিও কিছুদিনৰ পূৰ্বে পাকিস্তানী ড্ৰ'ণে আকাশমাৰ্গৰ পৰা ভাৰতৰ পঞ্জাৱত ৰাইফল আৰু অস্ত্ৰ-শস্ত্ৰ পেলোৱা ঘটনাই চাঞ্চল্যৰ সৃষ্টি কৰিছে ৷
সেনাবাহিনী হৈছে ড্ৰ'ণৰ সৰ্ববৃহৎ ক্ৰেতা ৷ ইয়াৰ উপৰিও ড্ৰ'ণ ব্যৱহাৰ কৰা হয় চুটি ছবি নিৰ্মাণ, বিবাহৰ ভিডিঅ' আৰু অন্য অনুষ্ঠানত ৷ ভাৰতত প্ৰায় 6 লাখ ড্ৰ'ণ ব্যৱহাৰ হৈ আছে আৰু সমগ্ৰ বিশ্বত 2021 লৈকে ড্ৰ'ণৰ বজাৰখন প্ৰায় 2200 কোটি মাৰ্কিন ডলাৰৰ হ'বগৈ বুলি অনুমান কৰা হৈছে ৷ ইয়াৰ ভিতৰত ভাৰতত ড্ৰ'ণৰ বজাৰখন হ'বগৈ 88.6 কোটি মাৰ্কিন ডলাৰৰ ৷ চৰকাৰে যদিও ড্ৰ'ণ সমূহৰ ওপৰত নিয়ন্ত্ৰণ ৰাখিবলৈ ৰাডাৰৰ ব্যৱহাৰ কৰিছে কিন্তু এতিয়াও সম্পূৰ্ণ ৰূপে সফল হ'বগৈ পৰা নাই ৷ চৌদি আৰবৰ তৈলক্ষেত্ৰ আৰু আৰু ড্ৰ'ণৰ সহায়ত আমেৰিকাৰ তথ্য চুৰি হোৱাটো হৈছে ইয়াৰ এটা চমু উদাহৰণ ৷ চীনে অবৈধভাবে ড্ৰ'ণৰ সহায়ত তথ্য সৰবৰাহ কৰাৰো অভিযোগ উত্থাপন হৈ আহিছে ৷ চীনে কম মূল্যত ড্ৰ'ন যোগান ধৰাৰ বাবে সমগ্ৰ বিশ্বৰ প্ৰায় 70% ড্ৰ'ণ চীনত নিৰ্মিত ৷
ভাৰতত ড্ৰ'ণৰ ব্যৱহাৰ ব্যক্তিগত প্ৰতিষ্ঠান সমূহৰ ভিতৰতে সীমাবদ্ধ ৷ চুটি ছবি নিৰ্মাণ আৰু চৰকাৰী সমীক্ষা সমূহতে সীমাৱদ্ধ হৈ আছে ড্ৰ'ণৰ ব্যৱহাৰ ৷ বিগত বৰ্ষৰ ডিচেম্বৰ মাহত অসামৰিক বিমান পৰিবহনৰ সঞ্চালক প্ৰধানে(DGCA) ড্ৰ'ণৰ ব্যৱহাৰৰ নিয়ম সমূহত আনিছিল সালসলনি ৷ ইয়াৰ লগতে অসামৰিক বিমান পৰিবহনৰ সঞ্চালক প্ৰধানে বানিজ্যক ড্ৰ'ণৰ ব্যৱহাৰৰ পৰিসৰ বৃদ্ধি কৰাৰ কথাও চিন্তা কৰিছে ৷ পথাৰত কীটনাশক চতিয়াবলৈ ড্ৰ'ণৰ ব্যবহাৰৰ কথা চিন্তা কৰা হৈছে ৷ ইয়াৰ দ্বাৰা উপকৃত হ'ব কৃষকসকল ৷ ইয়াৰ লগতে জৰুৰীকালীন সময়ত নিতৌ ব্যৱহাৰ কৰা সামগ্ৰী আৰু ঔষধ যোগান ধৰিবলৈ ব্যৱহাৰ কৰিব পৰা যাব ড্ৰ'ণ ৷ ভাৰত চৰকাৰে মহাৰাষ্ট্ৰ চৰকাৰৰ লগত এখন বুজাবুজিৰ চুক্তি স্বাক্ষৰ কৰিছে ৷ ৰাজ্যখনৰ 40,000 খন গাওঁৰ নক্সা তৈয়াৰ কৰিবলৈ সহায় লোৱা হ'ব ড্ৰ'ণৰ ৷
ড্ৰ'ণ ব্যৱহাৰৰ ক্ষেত্ৰত অগ্ৰণী ভূমিকা লৈছে অন্ধ্ৰ প্ৰদেশ আৰু তেলেংগানাই ৷ দুয়োখন ৰাজ্যই সমান্তৰালভাবে স্থাপন কৰিছে ড্ৰ'ণ কৰ্পৰেশ্বন আৰু ড্ৰ'ণ চিটি ৷ দেশৰ প্ৰায় 50 টা ষ্টাৰ্ট-আপে নিজৰ গবেষণাৰ বাবে ব্যৱহাৰ কৰে ড্ৰ'ণ ৷ ড্ৰ'ণৰ গুৰুত্বৰ প্ৰতি লক্ষ্য ৰাখি অসামৰিক বিমান পৰিবহনৰ সঞ্চালক প্ৰধানে(DGCA) ডিজিটেল স্কাই নামৰে এক অভিযান আৰম্ভ কৰিছিল ৷ লাখ টকা মূল্যৰ ওপৰৰ ড্ৰ'ণ ব্যৱহাৰৰ বাবে অনুমতি লোৱাটো বাধ্যতামূলক কৰা হৈছিল ৷ কিন্তু 250 গ্ৰাম ওজন আৰু 50 মিটাৰ উচ্চতালৈ উৰা মাৰিব পৰা ড্ৰ'ণৰ বাবে প্ৰয়োজন নহয় কোনো অনুমতিৰ ৷
ড্ৰ'ণ ব্যৱহাৰৰ প্ৰযুক্তি ব্যয়বহুল হোৱাৰ বাবে এই প্ৰযুক্তিক সকলো ক্ষেত্ৰত ব্যৱহাৰ কৰা নহয় ৷ গনতন্ত্ৰ দিৱস, স্বাধীনতা দিৱস আৰু নেতা সকলৰ সভাত এই প্ৰযুক্তিৰ ব্যৱহাৰ কৰা হয় ৷ অসামৰিক বিমান পৰিবহনৰ সঞ্চালক প্ৰধানে(DGCA) নিয়ম বান্ধি দিয়াৰ পিছতো এই নিয়ম সমূহ মানি নচলে প্ৰতিষ্ঠান সমূহে ৷ ইয়াৰ উপৰিও ড্ৰ'ণ পাইলটৰ অভাৱ আছে ভাৰতত ৷ ভাৰত চৰকাৰে ড্ৰ'ণ পাইলটৰ প্ৰশিক্ষনৰ বাবে হায়দৰাবাদত স্থাপন কৰিছে নেশ্যনেল স্কিল ট্ৰেইনিং ইনষ্টিটিউট ৷ ঘন বসতি থকা অঞ্চল সমূহত ড্ৰ'ণে মানুহৰ ব্যক্তিগত জীৱনলৈ কঢ়িয়াই আনে ভাবুকি ৷ চুটি ছবি আৰু বিভিন্ন অনুষ্ঠানৰ নামত খৰ্ব কৰা হয় ব্যক্তিগত স্বাধীনতা ৷ এই বিষয় আৰু সামগ্ৰিক পৰিস্থিতিৰ প্ৰতি লক্ষ্য ৰাখি কঠোৰ নিৰ্দেশনা প্ৰনয়ণ কৰাটো হৈ পৰিছে গুৰুত্বপূৰ্ণ ৷
