নেশ্যনেল ডেস্ক,৮ছেপ্টেম্বৰ: ঝাৰখণ্ডৰ দেওধৰ আৰক্ষী অধীক্ষকৰ বিৰুদ্ধে ৰুজু হোৱা গোচৰৰ শুনানি গ্ৰহণ কৰি লোকসভাৰ বিশেষাধিকাৰ কমিটীৰ চমন স্থগিত কৰিলে উচ্চতম ন্যায়ালয়ে । ঝাৰখণ্ডৰ ডি জি পি এম বি ৰাওৱে জনোৱা আবেদনৰ ভিত্তিত উচ্চতম ন্যায়ালয়ে জাননী জাৰি কৰে । পূৰ্বে লোকসভাৰ বিশেষাধিকাৰ কমিটীয়ে বি জে পি সাংসদ নিশিকান্ত ডুবেইৰ বিশেষাধিকাৰ খৰ্ব কৰাক লৈ অভিযোগ কৰিছিল ।
বিশেষাধিকাৰ কমিটীৰ সৈতে মিলি নিশিকান্ত ডুবেই অভিযোগ উত্থাপন কৰিছিল যে, ঝাৰখণ্ড মুক্তি মৰ্চাৰ নেতৃত্বাধীন ঝাৰখণ্ড চৰকাৰৰ কেইগৰাকীমান চৰকাৰী বিষয়াই ডুবে আৰু তেওঁৰ পৰিয়ালৰ সদস্যক ষড়যন্ত্ৰমূলকভাৱে অপৰাধজনিত কাৰ্যত জড়িত কৰিব বিচাৰিছে । এনে কাৰ্যই তেওঁলোকৰ সন্মানত আঘাত হানিছে বুলিও ক্ষোভ উজাৰে সাংসদগৰাকীয়ে ।
উল্লেখ্য যে, যোৱা জুলাই মাহত ডুবে আৰু তেওঁৰ পৰিয়ালৰ বিৰুদ্ধে প্ৰৱঞ্চনা, নকল নথিৰ ব্যৱহাৰ কৰাৰ গোচৰ ৰুজু কৰা হৈছিল । এই অভিযোগৰ উত্তৰত বিশেষাধিকাৰ কমিটীয়ে দেওধৰৰ আৰক্ষী অধীক্ষকক ৮ছেপ্টেম্বৰত হাজিৰ হ'বলৈ নিৰ্দেশ দিছিল । উচ্চতম ন্যায়ালয়ত ঝাৰখণ্ডৰ ডি জি পি এম বি ৰাওৱে প্ৰকাশ কৰে যে, এয়া বিশেষাধিকাৰ উলংঘনৰ ঘটনা নহয় আৰু ইয়াৰ পৰিৱৰ্তে বিশেষাধিকাৰ সমিতিয়ে ক্ষমতাৰ অপব্যৱহাৰ কৰিছে । বিশেষাধিকাৰ কমিটীয়ে আৰক্ষীৰ কামত বাধা প্ৰয়োগ কৰিছে বুলিও উচ্চতম ন্যায়ালয়ক অৱগত কৰে । ইয়াৰ পিছতে লোকসভাৰ বিশেষাধিকাৰ কমিটীয়ে দেওধৰৰ আৰক্ষী অধীক্ষকক হাজিৰ হ'বলৈ দিয়া চমন স্থগিত কৰে উচ্চতম ন্যায়ালয়ে ।
