নতুন দিল্লী, 1 এপ্ৰিলঃ মঙলবাৰে উচ্চতম ন্যায়ালয়ে কেন্দ্ৰলৈ এক গুৰুত্বপূৰ্ণ নিৰ্দেশনা প্ৰেৰণ কৰিছে । এই নিৰ্দেশনাটোৰ জৰিয়তে চৰকাৰক 24 ঘণ্টাৰ ভিতৰত এটি পৰ্টেল খুলিবলৈ কোৱা হৈছে । বিশ্বব্যাপী ত্ৰাসৰ সৃষ্টি কৰা মহামাৰী কোভিড-19 সম্পৰ্কে বিভিন্ন উৰাবাতৰি উলিয়াই সততে জনসাধাৰণক আতংকিত কৰা দেখা গৈছে । এই উৰা বাতৰি সমূহ নিয়ন্ত্ৰণ তথা প্ৰকৃত সত্যৰ বিষয়ে জানিব পৰাকৈ পৰ্টেলটো মুকলি কৰিবলৈ নিৰ্দেশ দিয়া হৈছে ।
লগতে সৰ্বোচ্চ ন্যায়ালয়ে দেশৰ ভিন্ন প্ৰান্তত নিজ ৰাজ্য এৰি কৰ্মসূত্ৰে আন আন ৰাজ্য সমূহত বাস কৰি বৰ্তমান পৰিস্থিতত আবদ্ধ হৈ পৰা লোকসকলৰ খোৱা-লোৱা, আশ্ৰয়, স্বাস্থ্য ইত্যাদিৰ চোৱা-চিতা কৰিবলৈয়ো কেন্দ্ৰক উপদেশ দিছে ।
মুখ্য় ন্য়ায়াধীশ এচ এ ব'বডে আৰু এন নাগেশ্বৰ ৰাওৰ এক বিচাৰপীঠে দুখন পি আই এলৰ শুনানি গ্ৰহণ কৰি এই নিৰ্দেশনা দিয়ে । পি আই এল দাখিল কৰিছিল পশ্চিমবংগ আৰু কেৰালাৰ দুজন লোকসভাৰ সাংসদে ।
