নিউজ ডেস্ক, ৮ জুনঃ মহামাৰী কৰ'ণা ভাইৰাছৰ মাজতে সমগ্ৰ দেশজুৰি আনলক ১.০ আৰম্ভ হোৱা লগে লগে কিছু পৰিমাণে স্বাভাবিক হৈ পৰিছে জনজীৱন । যাৰ পৰিপ্ৰেক্ষিততে দেওবাৰে সন্ধিয়া মুম্বাইৰ মেৰিন ড্ৰাইভত দেখা এটি দৃশ্যই শংকিত কৰিছে মুম্বাইৰ সচেতন নাগৰিকক । মেৰিন ড্ৰাইভত দেওবাৰে একাংশ লোকে মাস্ক পৰিধাণ কৰি ফুুৰিবলৈ ওলাই আহে যদিও কোনো ধৰণৰ সামাজিক দূৰত্ব বজাই নাৰাখে লোক সকলে । যাৰ বাবে শংকিত হৈছে মুম্বাইবাসী ।
মহাৰাষ্ট্ৰত উদ্ৱৱ ঠাকৰে নেতাত্বাধীন চৰকাৰখনে লক ডাউনত কিছু পৰিমাণে শিথিলতাৰ ঘোষণা কৰি চাইক্লিং, জগিং কৰাৰ বাবে অনুমতি প্ৰদান কৰাৰ পাচতে এই দৃশ্য দেখিবলৈ পোৱা যায় মেৰিন ড্ৰাইভত ।
আনহাতে, মহামাৰী COVID-19 দ্ৰুত গতিত বৃদ্ধি পোৱাৰ প্ৰতি লক্ষ্য ৰাখি মুম্বাইৰ এই দৃশ্যই আন লক্ নীতিৰ বাবে চিন্তিত কৰি তুলিছে সচেতন মহলক ।
উল্লেখ্য যে, দেওবাৰ পৰ্যন্ত মহাৰাষ্ট্ৰত COVID-19ত আক্ৰান্তৰ সংখ্যা মুঠ ৮৫,৯৭৫ গৰাকী । ইয়াৰে COVID-19ত আক্ৰান্ত ৪৮,৭৭৪ গৰাকীয়েই মুম্বাইৰ । আনহাতে, ৰাজ্যখনত ১,৬৩৮ গৰাকীৰ কৰ'ণা ভাইৰাছত আক্ৰান্ত হৈ মৃত্যু হৈছে বুলিও জানিব পৰা গৈছে ।
