নিউজ ডেস্ক, ২৩ মাৰ্চঃ লোকসভা নিৰ্বাচন নেখেলাৰ কথা প্ৰকাশঅভিনেতা তথা বিজেপি নেতা পৰেশ ৰাৱালৰ ৷ সংবাদ প্ৰতিষ্ঠান এ এন আইৰ আগত এই কথা উল্লেখ কৰিছে বিজেপি দলৰ সাংসদগৰাকীয়ে ৷
বিজেপি দলে 2019ৰ সাধাৰণ নিৰ্বাচনৰ বাবে প্ৰথমখন প্ৰাৰ্থী তালিকা প্ৰকাশ কৰাৰ পাচতেই এইদৰে মন্তব্য কৰে ৰাৱালে ৷ 2014 চনত বিজেপিৰ পৰা আহমেদাবাদ পূব সমষ্টিৰ পৰা সাংসদ হিচাপে লোকসভালৈ নিৰ্বাচিত হৈছিল জনপ্ৰিয় অভিনেতাগৰাকী ৷
এই সম্পৰ্কে নিজৰ মত প্ৰকাশ কৰি অভিনেতাগৰাকীয়ে কয় যে, "মই ৪-৫ মাহ আগতেই নিৰ্বাচনত প্ৰতিদ্বন্দ্বিতা নকৰাৰ কথা উল্লেখ কৰিছোঁ ৷ এই সম্পৰ্কে দলে সিদ্ধান্ত গ্ৰহণ কৰিব ৷ দলৰ হাইকামাণ্ডে লোৱা সিদ্ধান্তৰ সৈতে মই আগবাঢ়িম৷"
উল্লেখ্য যে, বিজেপিয়ে প্ৰকাশ কৰা প্ৰথমখন প্ৰাৰ্থী তালিকাত নাই বহুকেইগৰাকী জনপ্ৰিয় নেতাৰ নাম ৷ ইয়াৰ পৰিৱৰ্তে বহুকেইখন নতুন মুখে বিজেপিৰ প্ৰথমখন প্ৰাৰ্থী তালিকাত স্থান পোৱা পৰিলক্ষিত হৈছে ৷
