নতুন দিল্লী, 15 ডিচেম্বৰঃ নাগৰিকত্ব সংশোধনী আইনৰ বিৰুদ্ধে সমগ্ৰ উত্তৰ-পূৱৰ লগতে দেশজুৰি অব্যাহত উত্তাল প্ৰতিবাদ ৷ দেশৰ বিভিন্ন ঠাইৰ লগতে ৰাজধানী নতুন দিল্লীতো উত্তৰ-পূৱৰ ছাত্ৰ সমাজৰ তীব্ৰ প্ৰতিবাদ ৷ দেওবাৰে নতুন দিল্লীৰ জন্তৰ-মন্তৰত উত্তৰ-পূৱৰ ছাত্ৰ সমাজে প্ৰতিবাদ সাব্যস্ত কৰে ৷ ইটিভি ভাৰতৰ সাংবাদিকৰ আগত প্ৰতিবাদকাৰী ছাত্ৰসকলে কয় যে নাগৰিকত্ব সংশোধনী আইনখনে ভাৰতীয় সংবিধানক চূড়ান্ত অৱমাননা কৰিছে আৰু ই উত্তৰ-পূৱৰ নাগৰিকৰ জাতীয় অস্তিত্বৰ প্ৰতি চৰম ভাবুকিৰ সৃষ্টি কৰিব ৷
লগতে তেওঁলোকে প্ৰতিবাদকাৰী সকলৰ ওপৰত আৰক্ষীৰ বৰ্বৰতাক তীব্ৰ গৰিহণা ভাষাৰে গৰিহণা দিয়ে ৷ বন্ধ হৈ থকা ইন্টাৰনেট সেৱাও অতিশীঘ্ৰেই মুকলি কৰি দিয়াৰ বাবে দাবী জনায় ৷ গণতান্ত্ৰিক আন্দোলনক বাধা দিয়াৰ অধিকাৰ চৰকাৰৰ নাই ৷ নিজৰ প্ৰাপ্যৰ অধিকাৰ বিচাৰি কৰা আন্দোলনক চৰকাৰে মষিমূৰ কৰিবলৈ চেষ্টা চলাইছে ৷ অসম তথা উত্তৰ-পূৱৰ খিলঞ্জীয়া জনসাধাৰণে কোনোপধ্যেই এই জাতিধ্বংসী আইন মানি নলয় ৷ ইয়াৰোপৰি অনুপ্ৰৱেশকাৰীয়ে জুৰুলা কৰা উত্তৰ-পূৱৰ অৰ্থৈতিক ক্ষেত্ৰখনক কোঙা কৰিছে বুলিও তেওঁলোকে উল্লেখ কৰে ৷
আৰু পঢ়কঃ ডিব্ৰুগড় আৰু গুৱাহাটীত সাময়িকভাৱে শিথিল সান্ধ্য আইন
