নিউজ ডেস্ক, 9 মে': অন্ধ প্ৰদেশৰ প্ৰাক্তন মুখ্যমন্ত্ৰী আৰু TDPৰ প্ৰধান এন চন্দ্ৰ বাবু নাইডুয়ে প্ৰধান মন্ত্ৰীলৈ এখন পত্ৰ প্ৰেৰণ কৰে । এই পত্ৰৰ জৰিয়তে তেওঁ বিশাখাপট্টনমত সংঘটিত হোৱা এল জি পলিমাৰ উদ্যোগৰ গেছ নিৰ্গমণৰ ঘটনাৰ বৈজ্ঞানিক তদন্তৰ বাবে অনুৰোধ জনায় । সেয়ে তেওঁ বৈজ্ঞানিক বিশেষজ্ঞৰ দ্বাৰা তদন্ত সমিতি এখন গঠন কৰিবলৈ আহ্বান কৰে ।
নিৰ্গমণ হোৱা গেছ ষ্টাৰলিন বুলি প্ৰকাশ কৰিছে উদ্যোগটোৱে, কিন্তু তাত আন বিষাক্ত গেছো থকাৰ বিষয়ে পৰস্পৰ বিৰোধী মত প্ৰকাশ পাইছে । সেয়ে বৈজ্ঞানিকৰ দ্বাৰা তদন্ত কৰি স্বাস্থ্যত ইয়াৰ প্ৰভাৱ সম্পৰ্কে বুজাৰ প্ৰয়োজন আছে - পত্ৰখনত এইদৰে লিখে নাইডুৱে ।
ইতিমধ্যে নেছনেল গ্ৰীণ ট্ৰিবিউনেলে এল জি পলিমাৰ উদ্যোগলৈ জাননী প্ৰেৰণ কৰিছে । আনহাতে কেন্দ্ৰীয় প্ৰদূষণ নিয়ন্ত্ৰণ সমিতিয়ে আৰু পৰিবেশ মন্ত্ৰীয়ে দুখ প্ৰকাশ কৰিছে ।
ৰাজ্য চৰকাৰ খনে ভুক্তভোগী সকলৰ বাবে মুঠ 30 কোটি টকাৰ ক্ষতিপূৰণ তথা সাহায্য পুঁজি ঘোষণা কৰিছে । আনহাতে মৃতকৰ পৰিয়ালক 1 কোটি টকাকৈ দিয়াৰ কথাও ঘোষণা কৰিছে ।
