নিউজ ডেস্ক , 5 জানুৱাৰীঃ বাঘদাদ বিমান বন্দৰত আমেৰিকাই চলোৱা এয়াৰ ষ্ট্ৰাইকৰ এদিনৰ পাচতে শনিবাৰে ইৰাকৰ ৰাজধানীৰ গ্ৰীন জ'নত দুটা 'মৰ্টাৰ ৰাউণ্ড' আৰু আমেৰিকাৰ সেনাৰ চাৱনিত দুটা ৰকেটে আক্ৰমণ কৰে ৷ নিৰাপত্তাৰক্ষীয়ে জনোৱা অনুসৰি শনিবাৰে বিয়লি বাঘদাদত দুটা মৰ্টাৰ ৰাউণ্ডে
উচ্চ সুৰক্ষা বেষ্টনী থকা থকা গ্ৰীন জ'নত আক্ৰমণ কৰে য'ত মাৰ্কিন দূতাবাস অৱস্থিত ৷ ইৰাকী সেনাবাহিনীয়ে জনোৱা অনুসৰি এটা মৰ্টাৰ ৰাউণ্ডে জ'নৰ ভিতৰত আক্ৰমণ কৰে আৰু আনটোৱে বেষ্টনীটোৰ নিচেই সমীপত অৱতৰণ কৰে ৷ মৰ্টাৰ ৰাউণ্ডদ্বয়ে আক্ৰমণ কৰাৰ পাচত মাৰ্কিন চৌহদটোত চাইৰেণ বাজি উঠে ৷
আনহাতে বাঘদাদৰ বালাদ বিমানঘাটি, উত্তৰত দুটা কাট্যুসা ৰকেটে আক্ৰমণ কৰে য'ত মাৰ্কিন সেনা উপস্থিত আছিল ৷ জানিব পৰা মতে এই ঘটনাৰ পাচতে ৰকেট কেইটাৰ উৎস চিনাক্ত কৰিবলৈ বেষ্টনীটোৰ ওপৰত ড্ৰ'ণৰ জড়িয়তে তীক্ষ্ণ দৃষ্টি নিৱদ্ধ কৰা হয় ৷ উল্লেখ্য যে, বাঘদাদত মাৰ্কিন দূতাবাসৰ লগতে সমগ্ৰ দেশতে অৱস্থিত 5,200 টা মাৰ্কিন সেনাই বিগত কিছু মাহত ৰকেটৰ আক্ৰমণৰ সন্মুখীন হ'ব লগীয়া হৈছে ৷ আৰু এই আক্ৰমণৰ বাবে ওৱাশিংটনে ইৰাণ আৰু ইৰাকৰ লগত থকা মিত্ৰ সমূহক জগৰীয়া কৰিছে ৷ যোৱা মাহত এনে এক আক্ৰমণত উত্তৰ ইৰাকত কৰ্মৰত এজন মাৰ্কিন ঠিকাদাৰৰ মৃত্যু হৈছিল, যাৰ প্ৰতিশোধ ল'বলৈ আমেৰিকাই বিমানেৰে আক্ৰমণ কৰি ইৰাণৰ সমীপত 25 জন যোদ্ধাক হত্যা কৰিছিল ৷
উল্লেখ্য যে শুকুৰবাৰে চলোৱা এয়াৰ ষ্ট্ৰাইকত ইৰাণৰ জেনেৰেল কুদচ ফ'ৰ্চৰ প্ৰধান ইৰাণী জেনেৰেল কাচিম ছোলেইমানি আৰু ম'বিলাইজেচন ফ'ৰ্চৰ সহকাৰী কামাণ্ডাৰ আবু মহদী অল-মুহান্দীচৰ মৃত্যু হৈছিল ৷
লগতে পঢ়ক -শীঘ্ৰে ইৰাক ত্যাগ কৰিবলৈ আমেৰিকাৰ নাগৰিকক নিৰ্দেশ
