নেশ্যনেল ডেস্ক, 4 ফেব্ৰুৱাৰী : গুৰু আৰু মধ্যমীয়া উদ্যোগ মন্ত্ৰী জগদীশ চেট্টাৰে মঙলবাৰে গুৱাহাটীৰ এটা FMCG চেক্টৰত উপস্থিত ‘Invest Karnataka Hubballi 2020’ত বিনিয়োগৰ বাবে ব্যৱসায়ী আৰু উদ্যোগপতি সকলক আহ্বান জনায় ৷
উদ্যোগ বিভাগৰ বহুকেইজন বিষয়াৰ সৈতে উপস্থিত থকা মন্ত্ৰীগৰাকীয়ে 14 ফেব্ৰুৱাৰীত হুব্বাল্লী-ধাৰৱাড অঞ্চলত অনুষ্ঠিত হ'বলগা ‘Invest Karnataka Hubballi 2020’ উপস্থিত হৈ সকলোকে বিনিয়োগৰ বাবে আমন্ত্ৰণ জনায় ৷
ব্যৱসায়ী আৰু বিনিয়োগকাৰীৰ সৈতে মত বিনিময় কৰি মন্ত্ৰীগৰাকীয়ে কয় যে, মুখ্যমন্ত্ৰী বি. এছ. য়েডিয়ুৰাপ্পা নেতৃত্বাধীন কৰ্ণাটক চৰকাৰে ৰাজ্যখনক বিনিয়োগকাৰীৰ বাবে বন্ধুত্বপূৰ্ণ ৰাজ্য হিচাপে গঢ় দিয়াৰ প্ৰচেষ্টা হাতত লৈছে ৷ সেয়েহে নতুন উদ্যোগিক নীতিকো এনেদৰেই গঢ়ি তোলাৰ চেষ্টা কৰা হৈছে ৷ হুব্বাল্লী-ধাৰৱাড অঞ্চলৰ লগতে ৰাজ্যৰ অন্য স্থানসমূহো বিনিয়োগকাৰীৰ বাবে বন্ধুত্বপূৰ্ণ অঞ্চল হিচাপে ইতিমধ্যে পৰিগণিত হৈছে ৷ FMCG খণ্ডত বৰ্দ্ধিত ব্যৱসায়ৰ বাবে চৰকাৰে প্ৰয়োজনীয় সকলো সা-সুবিধা প্ৰদান কৰিছে ৷
উন্নয়নশীল আৰু অনুন্নত চহৰসমূহৰ উদ্যোগপতি সকলক ব্যৱসায়ৰ ক্ষেত্ৰত উদ্বুদ্ধ কৰি তুলিবৰ বাবে বিভিন্ন ধৰণৰ আঁচনি আৰম্ভ কৰা হৈছে ৷ আগন্তুক ‘Invest Karnataka Hubballi 2020’ এইক্ষেত্ৰত এক বৃহৎ পদক্ষেপ বুলি মন্তব্য কৰে মন্ত্ৰীগৰাকীয়ে ৷
গুৱাহাটীৰ বিনিয়োগকাৰীক আমন্ত্ৰণ জনোৱাৰ লগতে উত্তৰ কৰ্ণাটকত থকা পৰ্যাপ্ত পৰিমাণৰ সা-সুবিধাসমূহ গ্ৰহণ কৰিবলৈ মন্ত্ৰী চেট্টাৰে আহ্বান জনায় ৷
উল্লেখ্য যে, কৰ্ণাটক চৰকাৰে ৰাজহুৱা-ব্যক্তিগত অংশীদাৰিত্বৰ জৰিয়তে উদ্যোগিক খণ্ডৰ বিকাশৰ বাবে নতুন নীতি আৰম্ভ কৰিছে ৷
তেওঁ কয় যে, কৰ্ণাটকৰ জিডিপি হৈছে US $216 বিলিয়ন আৰু বাৰ্ষিকভাৱে 9.6 % কৈ ইয়াৰ বৃদ্ধি হৈ আহিছে ৷ আন্তঃৰাষ্ট্ৰীয় মানদণ্ডৰে উৎপাদন কৰিব পৰাকৈ ৰাজ্য চৰকাৰে সকলোৰে বাবে প্ৰতিযোগিতামূলক পৰিৱেশ প্ৰদান কৰিছে ৷ বিদেশৰ পৰা বিনিয়োগ লাভৰ ক্ষেত্ৰত দেশৰ তিনিখন শীৰ্ষ ৰাজ্যৰ ভিতৰত অন্যতম হৈছে কৰ্ণাটক আৰু 2018-19 চনত ৰপ্তানিৰ ক্ষেত্ৰত ই দ্বিতীয় স্থান অধিকাৰ কৰিছিল ৷ অটোম'বাইল, বৈদুত্যিক বাহন, বিমান আৰু প্ৰতিৰক্ষা, ইঞ্জিনিয়াৰিং আৰু মেছিন সামগ্ৰী, বৈদুত্যিক যন্ত্ৰ, তথ্য আৰু প্ৰযুক্তিবিদ্যা আৰু জৈৱ প্ৰযুক্তিবিদ্যাৰ বাবে ৰাজ্যখন প্ৰখ্যাত ৷ বিশ্ব বেংকৰ মতেও বাংগালুৰু হৈছে বিনিয়োগৰ ক্ষেত্ৰত দেশৰ ভিতৰতে চতুৰ্থ শ্ৰেষ্ঠ চহৰ ৷
কৰ্ণাটকৰ হুব্বাল্লীত বিনিয়োগ অনুষ্ঠানৰ উপৰিও চৰকাৰে 3 নৱেম্বৰৰ পৰা 5 নৱেম্বৰলৈ বাংগালুৰুত আয়োজন কৰিছে 'Global Investors’ Summit, Invest Karnataka 2020' ৷ গুৱাহাটীত ব্যৱসায়ীসকলৰ সৈতে মত বিনিময় কৰা সময়ত এই কথা জানিবলৈ দিয়ে মন্ত্ৰী জগদীশ চেট্টাৰে ৷
আৰু পঢ়ক : বাজেট 2020 : কি পালে পূৰ্বোত্তৰে ?
