নিউজ ডেস্ক, লুহিটপুৰ(অৰুণাচল প্ৰদেশ), 6 এপ্ৰিলঃ চাৰভিচ ভোটাৰ হিচাপে 2019 লোকসভা নিৰ্বাচনৰ প্ৰথমে ভোট দান কৰিলে অৰুণাচলৰ আই টি বি পি জোৱান সকলে ৷ শুকুৰবাৰে পুৱা 10 বজাৰ পৰা লুহিটপুৰত থকা আই টি বি পি এনিমেল ট্ৰেইনিং স্কুলত চিক্ৰেট পোষ্টেল বেলট আৰম্ভ হয় ৷ আই টি বি পি এ টি এচ’ৰ মুৰব্বি ডি আই জি শুধাকৰ নটৰাজনে প্ৰথম ভোটটো দি ভোটদান প্ৰক্ৰিয়াৰ আৰম্ভণি কৰে ৷ এ টি এচ ইউনিটৰ প্ৰায় 30 জন জোৱানৰ লগতে ৰাজ্যখনত থকা প্ৰায় 5000 জন জোৱানে ভোটদান কৰে ৷ ইয়াৰে 1000 জন আই টি বি পিৰ লোক আছিল ৷
উত্তৰাখণ্ড, গুজৰাট, বেংগালুৰু, বিহাৰ, ৰাজাস্থান, হৰিয়ানা, উত্তৰ প্ৰদেশ আৰু বিভিন্ন ঠাইত কৰ্মৰত হৈ থকা লোকসকললৈ ইতিমধ্যে বেলট পেপাৰ প্ৰেৰণ কৰা হৈছে ৷
এই বছৰ নিৰ্বাচন আয়োগে অধিক সংখ্যক চাকৰিয়ালক ভোটদান প্ৰক্ৰিয়াত সাঙুৰি ল'বলৈ যত্ন কৰিছে ৷ চ'ছিয়েল মিডিয়া, বৈদ্যুতিক মাধ্যম আৰু প্ৰিণ্ট মিডিয়াৰ জৰীয়তে সজাগতাৰ সৃষ্টি কৰিবলৈ চেষ্টা কৰা হৈছে ৷ প্ৰথমবাৰৰ বাবে অভিলেখ সংখ্যক চাৰভিচ ভোটাৰক ভোটদান প্ৰক্ৰিয়াত অন্ত্ৰভুক্ত কৰাৰ চেষ্টা কৰা হৈছে ৷
সামৰিক আৰু পেৰামিলিটেৰি ফৰ্চত কৰ্মৰত লোৰসকলক চাৰভিচ ভোটাৰ হিচাপে পৰিগণিত কৰা হয় ৷ তেওঁলোকে পোষ্টেল বেলট বা তেওঁলোকে নিজে বাচনি কৰি দিয়া প্ৰক্চি ভোটাৰৰ দ্বাৰা ভোটদান কৰিব পাৰে ৷
চাৰভিচ ভোটাৰ সুবিধাৰে প্ৰায় 30 লক্ষ ভোটাৰে এইবাৰ ভোটদান কৰিব ৷
