নিউজ ডেস্ক, 15 ডিচেম্বৰঃ পোহৰলৈ আহিছে অসমৰ স্বাস্থ্য খণ্ডৰ শোচনীয় ৰূপটো ৷ প্ৰাথমিক স্বাস্থ্য কেন্দ্ৰৰ বিপৰীতে চিকিৎসকৰ সংখ্যা কমেই উদঙাইছে অসমৰ স্বাস্থ্য খণ্ডৰ ভয়াৱহ স্বৰূপটো ৷ অধিকাংশ প্ৰাথমিক স্বাস্থ্য কেন্দ্ৰত এজন মাত্ৰ চিকিৎসকৰেই চলিছে বৃহত্তৰ একোটা অঞ্চলৰ স্বাস্থ্য সেৱা ৷
চেন্টাৰ ফ’ৰ ডিজিজ, ডায়নামিক, ইক’নোমিকছ এণ্ড পলিচি, ৱাশ্বিংটনৰ তথ্য অনুসৰি ভাৰতৰ স্বাস্থ্য কেন্দ্ৰ অনুযায়ী প্ৰায় 6 লাখ চিকিৎসকৰ অভাৱ বুলি প্ৰকাশ পাইছে ৷ ইয়াৰ উপৰি সামূহিক স্বাস্থ্য কেন্দ্ৰসমূহত 60% ৰ তুলনাত চিকিৎসকৰ সংখ্যা মাত্ৰ এজন আৰু 5% সামূহিক স্বাস্থ্য কেন্দ্ৰত এজনো চিকিৎসক নাই ৷
স্বাস্থ্য আৰু পৰিয়াল কল্যাণ মন্ত্ৰালয়ে লোকসভাত চৰকাৰী স্থিতিৰ স্পষ্টিকৰণ দি কয় যে 2018 চনৰ প্ৰতিবেদন অনুসৰি প্ৰকাশ পোৱা তথ্যত উল্লেখিত চিকিৎসকৰ সংখ্যা কম হোৱাটো ৰাজ্য চৰকাৰৰ হাতত থাকে ৷ ইয়াৰ নিযুক্তি ৰাজ্য চৰকাৰেহে প্ৰদান কৰে ৷
কিন্তু তথ্যত উল্লেখ কৰা অনুসৰি কেন্দ্ৰীয় চৰকাৰৰ বিত্তীয় সহযোগত ৰাজ্য চৰকাৰে চিকিৎসকক নিযুক্তি দিয়ে ৷ কেন্দ্ৰীয় চৰকাৰৰ সহায় অবিহনে ৰাজ্য চৰকাৰ এইক্ষেত্ৰত অসহায় ৷ বৰ্তমান দেশৰ অৰ্থ ব্যৱস্থাৰ ৰূপ দেখি অনাগত দিনত স্বাস্থ্য খণ্ডৰ অৱস্থা আৰু অধিক শোচনীয় হ’ব বুলি ধাৰণা কৰা হৈছে ৷
উত্তৰ প্ৰদেশত প্ৰাথমিক স্বাস্থ্য কেন্দ্ৰৰ সংখ্যা দেশৰ ভিতৰতে অধিক ৷ ইয়াত চিকিৎসকৰ সংখ্যাৰ অভাৱে কঠিন পৰিস্থিতিৰ সৃষ্টি কৰিছে ৷ আনহাতে অসমৰ 946 খন স্বাস্থ্য কেন্দ্ৰৰ বিপৰীতে চিকিৎসকৰ সংখ্যা মাত্ৰ 266 জন ৷
ইয়াৰোপৰি অন্ধ্ৰ প্ৰদেশ, বিহাৰ, ছত্তিশগড়, গুজৰাট, হিমাচল প্ৰদেশ, কৰ্ণাটক, ঝাৰখণ্ড আৰু ৰাজস্থানৰ অৱস্থা অতিকৈ শোচনীয় ৷ ছত্তিশগড়ৰ 793 খন স্বাস্থ্য কেন্দ্ৰৰ 295 খনত এজনো চিকিৎসক নাই ৷
এক সমীক্ষাৰ পৰা গম পোৱা যায় যে কেন্দ্ৰীয় চৰকাৰৰ মুখ্য আঁচনি আয়ুষ্মান ভাৰতে দেশৰ সকলো স্বাস্থ্য কেন্দ্ৰৰ উন্নীতকৰণৰ পোষকতা কৰে ৷ আৰু ইয়াৰ উন্নীতকৰণৰ বাবে ভাৰতে এক দীৰ্ঘ পথ অতিক্ৰম কৰিব লাগিব ৷
আৰু পঢ়কঃ প্লাষ্টিক মুক্ত সমাজ গঢ়াৰ বাবে ৰাজপথত নামিছে এজন যুৱক
