নতুন দিল্লী,10 ডিচেম্বৰঃ বহুচৰ্চিত নাগৰিকত্ব সংশোধনী বিধেয়কক লৈ দেশ-বিদেশত অব্যাহত আছে প্ৰতিক্ৰিয়া ৷ কেব সন্দৰ্ভত মাৰ্কিন সংস্থা ইউনাইটেড ষ্টেটছ কমিচন অন ইণ্টাৰনেছনেল ৰিলিজিয়াছ ফ্ৰিডমৰ মন্তব্যক পোনচাতেই নাকছ কৰিছে ভাৰতীয় বৈদেশিক মন্ত্ৰালয়ে ৷ এই সন্দৰ্ভত ভাৰতীয় বৈদেশিক পৰিক্ৰমা মন্ত্ৰালয়ৰ মুখপাত্ৰ ৰবীশ কুমাৰে কয়,"নাগৰিকত্ব সংশোধনী বিধেয়ক সন্দৰ্ভত সংস্থাটোৰ মন্তব্য সঠিক নহয় ৷" এই বিধেয়কখনে ভাৰতত বাস কৰি অহা এসময়ত চুবুৰীয়া তিনিখন ৰাষ্ট্ৰত ধৰ্মীয় উৎপীড়নৰ বলি হোৱা সকলকহে নাগৰিকত্ব প্ৰদানৰ প্ৰসংগহে উত্থাপন কৰিছে ৷ যিয়ে তেওঁলোকৰ বৰ্তমানৰ নাগৰিকত্ব সম্বন্ধীয় সমস্যা আৰু মানৱ অধিকাৰ বিষয়টোক অগ্ৰাধিকাৰ প্ৰদান কৰিছে ৷ যিসকল প্ৰকৃততে ধৰ্মীয় স্বাধীনতাৰ প্ৰতি দায়বদ্ধ তেওঁলোকে এনে প্ৰচেষ্টাক সমালোচনাৰ পৰিৱৰ্তে আদৰণি জনোৱাহে উচিত ৷" মুখপাত্ৰগৰাকীয়ে লগতে কয় যে এই বিধেয়কখনে নাগৰিকত্বৰ আৱেদনৰ ক্ষেত্ৰত সকলো সম্প্ৰদায়ৰ বাবে ইতিমধ্যে উপলব্ধ থকা ব্যৱস্থাসমূহৰ ওপৰত কোনো প্ৰভাৱ নেপেলায় ৷
তেওঁ আৰু কয়,"কেব আৰু এন আৰ চিয়ে কোনো ভাৰতীয় নাগৰিকৰ সৈতে ধৰ্মীয় বিশ্বাসক আধাৰ হিচাবে লৈ কোনো বৈষম্য কৰা নাই ৷ সকলো দেশে আনকি আমেৰিকায়েও বিভিন্ন নীতিৰ যোগেদি নিজ দেশৰ নাগৰিকৰ যোগ্যতা বিচাৰ কৰাৰ অধিকাৰ আছে ৷ "
বৈদেশিক মুখপাত্ৰগৰাকীয়ে মাৰ্কিন সংস্থাটোক সীমিত তথ্যৰে বিভ্ৰান্তিমূলক বৰ্ণনা দাঙি ধৰা বুলি সমালোচনা কৰে ৷
