নেশ্যনেল ডেস্ক, ২১ নৱেম্বৰ: কেন্দ্ৰীয় স্বাস্থ্য মন্ত্ৰালয়ে দেওবাৰে প্ৰকাশ কৰা শেহতীয়া তথ্য অনুসৰি, ভাৰতত কৰ'ণা আক্ৰান্তৰ ৪৫,২০৯টা নতুন ঘটনা পঞ্জীয়ন কৰা হৈছে । বৰ্তমানলৈকে মুঠ ৯০,৯৫,৮০৬ জন লোক মহামাৰীৰ কবলত পৰিছে । দেশত ৮৫,২১,৬১৭ জন লোক সুস্থ হৈ উঠিছে। নতুনকৈ ৫০১ জনৰো অধিক লোকে কৰ'ণা মহামাৰীৰে যুঁজি মৃত্যুৰে হাৰ মানিছে আৰু এতিয়ালৈকে মুঠ ১,৩৩,২২৭ জন ৰোগীয়ে প্ৰাণ হেৰুৱাইছে ।
দেওবাৰে পুৱা ৮ বজাত এই তথ্য প্ৰকাশ কৰে কেন্দ্ৰীয় স্বাস্থ্য মন্ত্ৰালয়ে । ধাৰাবাহিকভাৱে ১২ দিনৰ দিনাও দেশত নতুনকৈ মহামাৰীৰ কবলত পৰা ৰোগীৰ সংখ্যা ৫ লাখতকৈ কম হোৱা পৰিলক্ষিত হয় । ৰাষ্ট্ৰীয় আৰোগ্যৰ হাৰ হৈছেগৈ ৯৩.৬৯ শতাংশ আৰু মৃত্যুৰ হাৰ ১.৪৬ শতাংশলৈ হ্ৰাস পাইছে । ভাৰতত বৰ্তমান কৰ'ণা আক্ৰান্তৰ ৪,৪০,৯৬২টা ঘটনা সক্ৰিয় হৈ আছে । ভাৰতত প্ৰাণঘাতী কৰ'ণা মহামাৰীত আক্ৰান্তৰ সংখ্যাই যোৱা ৭ আগষ্টত ২০ লাখ অতিক্ৰম কৰে ।
আক্ৰান্তৰ সংখ্যা যোৱা ২৩ আগষ্টত ৩০ লাখ, ৫ ছেপ্টেম্বৰত ৪০ লাখ, ১৬ ছেপ্টেম্বৰত ৫০ লাখ, ২৮ ছেপ্টেম্বৰত ৬০ লাখ, ১১ অক্টোবৰত ৭০ লাখ, ২৯ অক্টোবৰত ৮০ লাখ আৰু ২০ নৱেম্বৰত ৯০ লাখলৈ বৃদ্ধি পায় । ইণ্ডিয়ান কাউন্সিল অৱ ৰিচাৰ্চৰ মতে, শনিবাৰে পৰীক্ষা কৰা ১০,৭৫,৩২৬টা নমুনাসহ এতিয়ালৈকে ভাৰতত ১৩.১৭ কোটিৰো অধিক লোকৰ নমুনা পৰীক্ষা কৰা হৈছে ।
