নিউজ ডেস্ক, 21 আগষ্টঃ উত্তৰাখণ্ডৰ বান-সাহাৰ্য অভিযানত নিয়োজিত এখন হেলিকপ্টাৰ দুৰ্ঘটনাগ্ৰস্থ হয় ৷ উত্তৰকাশী জিলাত অভিযান চলাই থকা হেলিকপ্টাৰখনে সাহাৰ্য বিতৰণ কৰি উভটি অহাৰ পথতে দুৰ্ঘটনাত পতিত হয় ৷ জিলাখনৰ মোল্ডিত সংঘটিত হোৱা দুৰ্ঘটনাটোত হেলিকপ্টাৰখনত থকা তিনিওগৰাকী লোকেই নিহত হয় ৷ মোৰিৰ পৰা মোল্ডিলৈ বুলি সাহাৰ্য অভিযানৰ বাবে গৈছিল দুৰ্ঘটনাগ্ৰস্থ হেলিকপ্টাৰখন ৷
ঘটনাস্থলীত আইটিবিপি আৰু এনডিআৰএফ বাহিনীৰ লোক উপস্থিত হৈ নিহতসকলৰ মৃতদেহ উদ্ধাৰ কৰিছে ৷ দুৰ্ঘটনাৰ পিচতে নিহতসকললৈ 15 লাখ টকাৰ এককালীন সাহাৰ্য ঘোষণা কৰিছে উত্তৰাখণ্ডৰ মুখ্যমন্ত্ৰী ত্ৰিৱেন্দ্ৰ সিং ৰাৱাটে ৷
উল্লেখ্য যে, বিগত কিছুদিন ধৰি উত্তৰাখণ্ডত নেৰানেপেৰা বৰষুণ অব্যাহত আছে ৷ ৰাজ্যখনত হোৱা বৰষুণৰ ফলতে বহুঠাইত যোগাযোগ ব্যৱস্থা ব্যাহত হৈ পৰাৰ লগতে বন্ধ হৈ পৰিছে চৰকাৰী-বেচৰকাৰী অনুষ্ঠান প্ৰতিষ্ঠান ৷ বৰষুণৰ লগতে ডাৱৰ বিস্ফোৰণৰ ফলত ৰাজ্যখনৰ উত্তৰকাশী জিলাত অব্যাহত আছে ভূমিস্খলনৰ ঘটনা ৷ এনে পৰিস্থিতিতে সাহাৰ্য যোগান ধৰি উভটি অহাৰ পথত দুৰ্ঘটনাত পতিত হয় হেলিকপ্টাৰখন ৷
