কাশ্মীৰত অব্যাহত অচলাৱস্থাঃ নিৰাপত্তাৰক্ষীৰে সংঘৰ্ষত আহত 4 জন

কাশ্মীৰ উপত্যকাত অব্যাহত অচলাৱস্থা ৷ ইউৰোপিয়ান ইউনিয়নৰ 23 জনীয়া প্ৰতিনিধি মণ্ডলৰ জম্মু-কাশ্মীৰ ভ্ৰমণৰ সময়তেই বিক্ষোভকাৰী আৰু নিৰাপত্তাৰক্ষীৰ মাজত সংঘৰ্ষৰ সূত্ৰপাত ৷ সংঘৰ্ষত আহত চাৰিজনকৈ লোক ৷

নিউজ ডেস্ক,29 অক্টোবৰঃ মংগলবাৰে কাশ্মীৰত বিক্ষোভকাৰী আৰু নিৰাপত্তাৰক্ষীৰ মাজত সংঘটিত হোৱা সংঘৰ্যত চাৰিজনকৈ লোক আহত হয় ৷ উক্ত সংঘৰ্ষটো সংঘটিত হোৱাৰ পাছতেই অচল হৈ পৰে ৰাজধানী শ্ৰীনগৰৰ স্বাভাৱিক জনজীৱন ৷ এজন আৰক্ষী বিষয়াৰ পৰা প্ৰাপ্ত তথ্যনুসৰি সমগ্ৰ শ্ৰীনগৰতে এই ঘটনাৰ পাছত দোকান-পোহাৰ আৰু অন্যান্য ব্যৱসায়ীক প্ৰতিষ্ঠানসমূহ বন্ধ হৈ পৰে ৷

জানিব পৰা মতে, ইউৰোপিয়ান ইউনিয়নৰ 23 জনীয়া প্ৰতিনিধিমণ্ডলে সংবিধানৰ 370 নং অনুচ্ছেদ প্ৰত্যাহাৰৰ পাছত ৰাজ্যখনৰ সামগ্ৰিক পৰিস্থিতি পৰ্যবেক্ষণৰ বাবে অহাৰ দিনাই সংঘৰ্ষৰ উদ্ভৱ হয় ৷

আৰক্ষী বিষয়া এগৰাকীৰ ভাষ্য অনুসৰি কাশ্মীৰৰ ভিন্ন অঞ্চলৰ লগতে শ্ৰীনগৰ চহৰৰ বিভিন্ন প্ৰান্তত বিক্ষোভকাৰী আৰু নিৰাপত্তা বাহিনীৰ সৈতে হোৱা সংঘৰ্ষত চাৰিজনকৈ লোক আহত হয় ৷

আনহাতে বাতৰি যুগুত কৰা পৰলৈকে চহৰৰ বিভিন্ন এলেকাৰ লগতে উপত্যকাৰ বিভিন্ন অঞ্চলত সংঘৰ্ষ অব্যাহত আছে ৷ জম্মু-কাশ্মীৰৰ পৰা সংবিধানৰ বিশেষ মৰ্যাদা 370 নং অনুচ্ছেদ প্ৰত্যাহাৰ আৰু ৰাজ্যখনক দ্বি-খণ্ডিত কৰি দুখনকৈ কেন্দ্ৰীয় শাসিত অঞ্চলৰূপে ঘোষণা কৰাৰ 86 দিন ওকলি যোৱাৰ পাছতো উপত্যকাত স্বাভাৱিক জীৱন-যাত্ৰা আজিও অচল হৈ আছে ৷

ৰাজ্যখনৰ বজাৰসমূহ অনিৰ্দিষ্টকালীনভাৱে বন্ধ হৈ থকাৰ বিপৰীতে নিৰাপত্তাৰক্ষী আৰু বিক্ষোভ প্ৰদৰ্শনকাৰীৰ মাজত সংঘটিত সংঘৰ্ষৰ পৰিপ্ৰেক্ষিতত প্ৰায়বোৰ যান-বাহনৰ চলাচল বন্ধ হৈ আছে ৷

বিভিন্ন ব্যৱসায়ীয়ে বিগত দুমাহ ধৰি দোকানসমূহ বন্ধ ৰখাৰ দৰে আজিও বন্ধ ৰাখিবলৈ বাধ্য হৈ পৰাৰ কথা অৱগত কৰে নাম প্ৰকাশত অনিচ্ছুক আৰক্ষী বিষয়াগৰাকীয়ে ৷