নিউজ ডেস্ক, 14 আগষ্টঃ দেশ এৰি পলাবলৈ লওঁতেই গ্ৰেপ্তাৰ প্ৰাক্তন আইএএছ বিষয়া শ্বাহ ফইজল ৷ জম্মু-কাশ্মীৰ ৰাজহুৱা সুৰক্ষা আইন (Jammu and Kashmir Public Safety Act)ৰ অধীনত গ্ৰেপ্তাৰ হয় দেশৰ প্ৰাক্তন সৰ্বভাৰতীয় অসামৰিক সেৱাৰ বিষয়াগৰাকী ৷ নতুন দিল্লীৰ ইন্দিৰা গান্ধী আন্তঃৰাষ্ট্ৰীয় বিমানবন্দৰত সুৰক্ষাকৰ্মীয়ে গ্ৰেপ্তাৰ কৰে প্ৰাক্তন আইএএছ বিষয়াগৰাকীক ৷ আৰক্ষীয়ে প্ৰকাশ কৰা তথ্য অনুসৰি, শ্বাহ ফইজলে দেশ এৰি পলায়ন কৰিবলৈ লৈছিল ৷ নতুন দিল্লীৰ পৰা বষ্টনলৈ বুলি যাবলৈ লৈছিল প্ৰাক্তন আইএএছ বিষয়াগৰাকীয়ে ৷ প্ৰাক্তন আইএএছ বিষয়াগৰাকীক জম্মু-কাশ্মীৰ ৰাজহুৱা সুৰক্ষা আইন (Jammu and Kashmir Public Safety Act)ৰ অধীনত গ্ৰেপ্তাৰ কৰি শ্ৰীনগৰলৈ প্ৰেৰণ কৰা হয় ৷
উল্লেখ্য যে, 1983 চনৰ 17 মে'ত জন্মগ্ৰহন কৰা শ্বাহ ফইজলে 2009 চনত সৰ্বভাৰতীয় অসামৰিক সেৱা পৰীক্ষাত দেশৰ ভিতৰতে প্ৰথম স্থান দখল কৰিবলৈ সক্ষম হৈছিল ৷ জম্মু-কাশ্মীৰৰ পৰা সৰ্বভাৰতীয় সেৱা পৰীক্ষাত প্ৰথম স্থান দখল কৰিবলৈ সক্ষম হোৱা শ্বাহ ফইজল ৰাজ্যখনৰ ভিতৰতে প্ৰথমগৰাকী লোক আছিল ৷ কাশ্মীৰি লোকক অন্যানভাৱে হত্যা কৰা বুলি প্ৰতিবাদ কৰি 2019 চনত নিজৰ সেৱাৰ পৰা স্বেচ্ছাই অৱসৰ লৈছিল ৷ পৰৱৰ্তী সময়ত 2019 চনৰ 16 মাৰ্চত জম্মু-কাশ্মীৰ পিপুলছ মুভমেন্ট (Jammu and Kashmir People's Movement) নামে এক ৰাজনৈতিক দল প্ৰতিষ্ঠা কৰি প্ৰত্যক্ষ ৰাজনীতি ভৰি দিছিল প্ৰাক্তন আইএএছ বিষয়া শ্বাহ ফইজলে ৷
