নেশ্যনেল ডেস্ক,৪ছেপ্টেম্বৰ : তামিলনাডুৰ ছালেমত ভয়ংকৰ অগ্নিকাণ্ডত প্ৰাণ গ'ল একেটা পৰিয়ালৰে ৫জন সদস্যৰ । ছালেমৰ নৰছ'ধিপট্টিৰ আনবালাগন নামৰ এজন লোকৰ ঘৰত শুক্ৰবাৰে সংঘটিত হয় এই হৃদয় বিদাৰক ঘটনা । পৰিয়ালৰ আটাইকেইজন সদস্য শুই থকা অৱস্থাতে জুইৰ লেলিহান শিখাই আৱৰি ধৰে বাসগৃহটো । অগ্নি নিৰ্বাপক বাহিনীয়ে জুই নুমুৱাৰ চেষ্টা চলায় যদিও দুৰ্ভাগ্যবশতঃ পৰিয়ালটোৰ ৫জন সদস্যৰ মৃত্যু হয় ।
আনবালাগন নামৰ লোকজনৰ পত্নী মহেশ্বৰী, ভাতৃ কাৰ্থী, কাৰ্থীৰ পত্নী আৰু দুই পুত্ৰই অগ্নিদগ্ধ হৈ কৰুণ মৃত্যুক আকোঁৱালি হয় । আনহাতে সংকটজনক অৱস্থাত আনবালাগনক চিকিৎসালয়ত ভৰ্তি কৰোৱা হয় । অগ্নিকাণ্ড বাসগৃহটোৰ গ্ৰাউণ্ড ফ্ল'ৰত সংঘটিত হৈছিল আৰু অগ্নি নিৰ্বাপক বাহিনীয়ে প্ৰথম মহলাৰ পৰা আনবালাগনৰ পিতৃ-মাতৃ আৰু কন্যাক উদ্ধাৰ কৰিবলৈ সক্ষম হয় । আনবালাগন আৰু কাৰ্থীয়ে ছালেমত কাঠৰ কাম কৰা এটা উদ্যোগ চলাইছিল । ৰামাস্বামী নগৰত পৰিয়ালসহ বাস কৰিছিল দুয়ো ভাতৃয়ে । প্ৰথমিক তদন্তত আৰক্ষীয়ে শ্বৰ্ট চাৰ্কিট হৈ অগ্নিকাণ্ডৰ সূত্ৰপাত হয় বুলি সন্দেহ প্ৰকাশ কৰিছে ।
লগতে পঢ়ক : লাওখোৱাত বান হে শেষ হ’ল সমস্যা নহয়
