নতুন দিল্লী, ১৫ ডিচেম্বৰঃ নতুন দিল্লীৰ শ্বাহীনবাগত অনুষ্ঠিত নাগৰিকত্ব (সংশোধনী) আইন(কা),ৰাষ্ট্ৰীয় নাগৰিক পঞ্জী আৰু ৰাষ্ট্ৰীয় জনসংখ্যা পঞ্জীয়নৰ বিৰুদ্ধে কৰা প্ৰতিবাদৰ আজি এবছৰ সম্পূৰ্ণ হয় ।
কেইবাটাও বিষয়েৰে ২০১৯ চনৰ ১৫ ডিচেম্বৰত নতুন দিল্লীৰ শ্বাহীনবাগত আৰম্ভ হৈছিল তীব্ৰ প্ৰতিবাদ । প্ৰায় ১০০ দিন ধৰি ধাৰাবাহিক ভাৱে চলিছিল এই প্ৰতিবাদ । কিন্তু মাৰ্চ মাহৰ পৰা আৰম্ভ হোৱা কৰণা মহামাৰীৰ পৰিপ্ৰেক্ষিতত লাহে লাহে স্তিমিত হয় এই আন্দোলন আৰু মাৰ্চ মাহৰ ২৪ তাৰিখে প্ৰায় সমাপ্ত হৈ পৰে গোটেই আন্দোলনটো ।
এই প্ৰতিবাদৰ ফলত নতুন দিল্লী, নয়দা আৰু ফৰিদাবাদ সংযোগী মূল পথটো প্ৰায় বন্ধ হৈ পৰা লগতে ব্যাহত হৈ পৰিছিল যাতায়াত ব্যৱস্থা । সমান্তৰালভাৱে দিল্লীৰ এন চি আৰৰ লাখ লাখ লোক প্ৰভাৱিত হৈছিল এই প্ৰতিবাদৰ সময়ত । পথ বন্ধ হোৱা ঘটনাটো ইমানেই স্পৰ্শকাতৰ হৈ পৰিছিল যে এই বিষয়ত মাননীয় উচ্চতম ন্যায়ালয়ে শুনানি গ্ৰহণ কৰিবলগা হৈছিল ।
উচ্চতম ন্যায়ালয়ে প্ৰতিবাদকাৰীৰ সৈতে আলোচনাত মিলিত হবলৈ এটা প্ৰতিনিধি দলো গঠন কৰি দিছিল ।
যিহেতু এই আন্দোলনত বিপুল সংখ্যক মহিলাই অংশগ্ৰহণ কৰিছিল, সেয়ে ইয়াক মহিলা আন্দোলন বুলিও কোৱা হৈছিল । লাখ লাখ প্ৰতিবাদকাৰীয়ে এই আন্দোলনৰ জৰিয়তে নাগৰিকত্ব সংশোধনী আইন বাতিলৰ বাবে প্ৰতিবাদ জনাইছিল ।
লগতে চাওকঃ অসহায় যুৱতীক ৰক্ষা কৰিবলৈ গৈ আক্ৰমণৰ বলি সাংবাদিক
