নেশ্যনেল ডেস্ক, 26 ফেব্ৰুৱাৰীঃ দিল্লীৰ হিংসাত্মক ঘটনাৰ বাবে কংগ্ৰেছ সভানেত্ৰী ছোনিয়া গান্ধীয়ে কেন্দ্ৰীয় আৰু দিল্লী চৰকাৰেই দায়ী বুলি উল্লেখ কৰে ৷ এই সংঘৰ্ষৰ দায়িত্ব স্বীকাৰ কৰি দেশৰ গৃহমন্ত্ৰী অমিত শ্বাহে পদত্যাগ কৰিব লাগে বুলি উল্লেখ কৰে ছোনিয়া গান্ধীয়ে ৷ বুধবাৰে কংগ্ৰেছ কাৰ্যনিৰ্বাহক সমিতিৰ বৈঠকৰ পিচত এক সংবাদমেল সম্বোধন কৰি কংগ্ৰেছ সভানেত্ৰীগৰাকীয়ে দিল্লীৰ হিংসাত্মক সংঘৰ্ষৰ আঁৰত এক গভীৰ ৰাজনৈতিক ষড়যন্ত্ৰ লুকাই আছে বুলি উল্লেখ কৰে ৷ আনহাতে এই ষড়যন্ত্ৰৰ আভাস দিল্লী বিধানসভা নিৰ্বাচনৰ সময়ত কেইবাগৰাকীও বিজেপি নেতাই প্ৰদান কৰা সাম্প্ৰদায়িক বিষবাষ্পৰ ভাষণতেই পোৱা গৈছিল বুলি উল্লেখ কৰে ছোনিয়া গান্ধীয়ে ৷ দিল্লী সংঘৰ্ষৰ বাবে কেন্দ্ৰীয় গৃহমন্ত্ৰী অমিত শ্বাহৰ পদত্যাগৰ লগতে দিল্লীৰ মুখ্যমন্ত্ৰী অৰবিন্দ কেজৰিৱালে শান্তি প্ৰচেষ্টাত ব্যৰ্থ হোৱা বুলিও মন্তব্য আগবঢ়াই কংগ্ৰেছ সভানেত্ৰীগৰাকীয়ে ৷ ইয়াৰোপৰি এই হিংসাত্মক ঘটনাক লৈ বিজেপি নেতা কপিল মিশ্ৰাই কৰা মন্তব্যকলৈও তেওঁ তীব্ৰ কটাক্ষ কৰে ৷ কংগ্ৰেছ কাৰ্যনিৰ্বাহক সমিতিয়ে দিল্লীৰ এই সংঘৰ্ষৰ বাবে সমাধানৰ বাট প্ৰশস্ত কৰিবলৈ এটা প্ৰস্তাৱ দাখিল কৰিছে আৰু অতি শীঘ্ৰেই এই সন্দৰ্ভত তদন্ত আৰম্ভ কৰি ব্যৱস্থা গ্ৰহণ কৰাৰ বিষয়ে উল্লেখ কৰে ৷
কংগ্ৰেছ কাৰ্যনিৰ্বাহক সমিতিৰ প্ৰস্তাৱ ছোনিয়া গান্ধীয়ে পৰ্যবেক্ষণ কৰি দিল্লীৰ হিংসাজৰ্জৰ অঞ্চলসমূহত নিৰাপত্তাৰক্ষীৰ সংখ্যা বৃদ্ধি কৰি পৰিস্থিতি নিয়ন্ত্ৰণৰ ব্যৱস্থা কৰিব লাগে আৰু প্ৰত্যেক চুবুৰীতে একোখন শান্তি কমিতি গঠনৰ বাবে আহ্বান জনায় ৷ আনহাতে দিল্লীৰ মুখ্যমন্ত্ৰী অৰবিন্দ কেজৰিৱালক হিংসাজৰ্জৰ অঞ্চলসমূহ পৰিদৰ্শন কৰি ৰাইজৰ লগত আলোচনা কৰাৰ বাবে আহ্বান জনায় ছোনিয়া গান্ধীয়ে ৷ উল্লেখ্য যে ৰাষ্ট্ৰপতি ৰামনাথ কোবিন্দক সাক্ষাৎ কৰাৰ উদ্দেশ্যে কংগ্ৰেছৰ ৰাষ্ট্ৰপতি ভৱনলৈ যাত্ৰা বৃহস্পতিবাৰলৈ স্থগিত ৰখা বুলি উল্লেখ কৰে কংগ্ৰেছ মুখপাত্ৰ ৰণদ্বীপ সুৰ্যেৱালাই ৷
আৰু পঢ়কঃকপিল মিশ্ৰা, অনুৰাগ ঠাকুৰ আৰু প্ৰভেশ বৰ্মাৰ বিৰুদ্ধে গোচৰ ৰুজুৰ নিৰ্দেশনা
