বিষয় কেবঃকেৰেলা চৰকাৰৰ স্থিতিক আদৰণি অসম প্ৰদেশ কংগ্ৰেছ কমিটিৰ

নাগৰিকত্ব সংশোধনী আইন সম্পৰ্কে কেৰেলাৰ মুখ্যমন্ত্ৰীৰ স্থিতিক আদৰণি অসম প্ৰদেশ কংগ্ৰেছৰ দলপতি দেবব্ৰত শইকীয়াৰ,কেব সন্দৰ্ভত কেন্দ্ৰীয় চৰকাৰে অসমীয়াৰ আবেগক প্ৰাধান্য দিয়া উচিত বুলি মন্তব্য প্ৰকাশ কৰে বিৰোধী দলপতিজনে

নতুন দিল্লী,13 ডিচেম্বৰঃ নাগৰিকত্ব সংশোধনী আইন সম্পৰ্কে সৰ্বত্ৰে বৰ্তমানেও প্ৰতিবাদ অব্যাহত আছে ৷ ইয়াৰ মাজতে কেৰেলা চৰকাৰে কেব সন্দৰ্ভত নিজৰ স্থিতি প্ৰকাশ কৰে ৷ চৰকাৰখনে প্ৰকাশ কৰা এই স্থিতিক অসম প্ৰদেশ কংগ্ৰেছৰ দলপতি দেবব্ৰত শইকীয়াই আদৰণি জনাইছে ৷ লগতে কেন্দ্ৰীয় চৰকাৰে অসমীয়াৰ আবেগক প্ৰাধান্য দিয়া উচিত বুলি মন্তব্য প্ৰকাশ কৰে বিৰোধী দলপতিজনে ৷ ‘1971 চনৰ 25 মাৰ্চলৈ অসমলৈ অহা বিদেশীখিনিক ভাৰতীয় নাগৰিকত্ব প্ৰদানক আমি স্বাগতম জনাইছো ৷ কিন্তু কেন্দ্ৰীয় চৰকাৰে ইয়াক সলনি কৰি 31 ডিচেম্বৰ 2014 কৰা কাৰ্যক আমি কোনোপধ্যে মানিব নোৱাৰো’ বুলি কয় শইকীয়াই ৷ দেবব্ৰত শইকীয়াই শুকুৰবাৰে দেশৰ ৰাজধানী চহৰ দিল্লীত কেবৰ বিৰুদ্ধে অনুষ্ঠিত এক প্ৰতিবাদী কাৰ্যসূচীত অংশগ্ৰহণ কৰে ৷ এই প্ৰতিবাদী কাৰ্যসূচীত কেবৰ বিৰোধিতাৰে শতাধিক প্ৰতিবাদকাৰীয়ে অংশগ্ৰহণ কৰে ৷

ইফালে দিল্লীত থকা উত্তৰ-পূৰ্বাঞ্চলৰ লোক বিশেষকৈ অসমীয়া ভাষীৰ সৈতে ই টিভিৰে হোৱা এক সাৎক্ষাকাৰত প্ৰতিবাদকাৰীসকলে কেব গ্ৰহণ নকৰাৰ কথা উল্লেখ কৰে ৷ ‘আমি কেতিয়াও কেব গ্ৰহণ নকৰো ৷ এয়া আমাৰ সংবিধানৰ পৰিপন্থী নহয়, ইয়ে অসমৰ শান্তি বিঘ্নিত কৰিছে’ বুলি প্ৰতিবাদকাৰীসকলে আক্ষেপেৰে কয় ৷

স্মৰ্তব্য যে, বৃহস্পতিবাৰে ৰাষ্ট্ৰপতি ৰামনাথ কোবিন্দে নাগৰিকত্ব সংশোধনী বিলখনত স্বাক্ষৰ কৰি ইয়াক আইনত পৰিণত কৰে ৷

লগতে চাওকঃসান্ধ্য আইন বাহাল যদিও উন্নত হৈছে গুৱাহাটীৰ পৰিস্থিতি