নিউজ ডেস্ক, 3 এপ্ৰিল : মধ্যপ্ৰদেশৰ ইন্দোৰত শুকুৰবাৰে দেখা গ'ল এটা আশ্চৰ্যকৰ দৃশ্য ৷ কৰ'ণা ভাইৰাছৰ ভয়াৱতাৰ প্ৰতি লক্ষ্য ৰাখি ঘোষণা কৰা লক্ ডাউন ভংগকাৰীক ৰোধিবলৈ আৰক্ষীয়ে ল'লে অভিনৱ পদক্ষেপ ৷ ভূতৰ বেশ-ভূষাৰে পথলৈ বিনাকাৰণে ওলাই অহা মানুহক ভয় খুৱাই ঘৰলৈ পঠিওৱাৰ চেষ্টা ইন্দোৰ আৰক্ষীৰ ৷
একাংশ সমাজকৰ্মীৰ সহায়ত বিজয়নগৰ আৰক্ষীয়ে এই পন্থা অৱলম্বন কৰে ৷ তেওঁলোকে ভূতৰ বেশ পৰিধান কৰি কলনি, বস্তি আদিৰ পথেৰে খোজ কাঢ়ি ফুৰে আৰু মানুহক ভয় খুৱাবলৈ বিশেষ ধৰণে চিঞৰে ৷ যাতে মানুহবোৰ ওলাই নুফুৰি ঘৰতে সোমাই থাকে ৷
আৰক্ষীয়ে ভূতৰ এটি ভিডিঅ' প্ৰস্তুত কৰি চ'চিয়েল মিডিয়াত প্ৰচাৰ কৰে ৷ তেওঁলোকে কয় যে, ছগৰাকী সদস্যৰে তেনে এটি দল গঠন কৰা হৈছে যি বস্তি অঞ্চলৰ মানুহক কৰ'ণা অথবা ক'ভিড-19 সম্পৰ্কে জ্ঞান দিয়ে ৷ ভূতৰূপী স্বেচ্ছাসেৱক সকলে কাৰ্ফিউৰ সময়ত ঘূৰি ফুৰা মানুহক ভয় খুৱাই আৰু সঁকীয়াই দিয়ে যে, যদি তেওঁ এনেদৰে ঘূৰি ফুৰে তেন্তে কৰ'ণা ভাইৰাছ তেওঁৰ ওচৰলৈ আহিব ৷
লগতে পঢ়ক : প্ৰধানমন্ত্ৰী সাহায্য পুঁজিৰ নামত বহু কেইটা ভুৱা একাউন্ট !
ইন্দোৰত প্ৰায় 89 গৰাকী লোক কৰ'ণা আক্ৰান্ত হৈছে, ইয়াৰে পাঁচ গৰাকীয়ে ইতিমধ্যে মৃত্যুক আঁকোৱালি লৈছে ৷ 25 মাৰ্চৰ পৰা ইন্দোৰত কাৰ্ফিউ ঘোষণা কৰা হৈছিল, মধ্যপ্ৰদেশৰ বাণিজ্যিক ৰাজধানী স্বৰূপ চহৰখন 15 দিন পূৰ্বলৈকে জনসমাগমপূৰ্ণ আছিল যদিও বৰ্তমান ই ভূতৰ চহৰলৈ পৰিণত হৈছে ৷
লগতে পঢ়ক : মুছলমানক ঘৰতেই নামাজ পঢ়িবলৈ আহ্বান আৰ্শ্বাদ মাদানীৰ
