বহিঃ বিশ্বৰ পৰা বিচ্ছিন্ন অৰুণাচল প্ৰদেশ

সোমবাৰে বিয়লি ভাগত অৰুণাচল প্ৰদেশৰ পশ্চিম কামেং জিলাত সংঘটিত হয় এক ভয়ংকৰ ডাৱৰ বিস্ফোৰণ ৷ বিস্ফোৰণৰ ফলত ৰাজ্যখনৰ বহুকেইটা পথ; বিশেষকৈ সামৰিক বাহিনীৰ বাবে গুৰুত্বপূৰ্ণ বুলি বিবেচিত বহুকেইটা পথেৰে যোগাযোগ ব্যৱস্থা ব্যাহত হৈ পৰিছে ৷ বৰ্তমানে অঞ্চলটোত বৰ্ডাৰ ৰ'ডছ অৰ্গেনাইজেশ্বনে ক্ষীপ্ৰতাৰে পুনৰঃনিৰ্মাণৰ কাম আৰু আইটিবিপিকে ধৰি স্থলসেনা আৰু দুৰ্যোগ প্ৰশমন বাহিনীয়ে উদ্ধাৰ কাৰ্য অব্যাহত ৰখাৰ

তেজপুৰ, 9 জুলাইঃ অৰুণাচল প্ৰদেশৰ পশ্চিম কামেং জিলাত সংঘটিত হোৱা ভয়ংকৰ ডাৱৰ বিস্ফোৰণৰ ফলত অঞ্চলটোত ব্যাহত হৈ পৰিছে যোগাযোগৰ সকলো মাধ্যম ৷ জিলাখনৰ অতিৰিক্ত উপায়ুক্ত কাচাং ৱাংদাই ৰাজ্যখনৰ মুখ্যমন্ত্ৰীলৈ ঘটনা সম্পৰ্কে জৰুৰী বাৰ্তা প্ৰেৰণ কৰিছে ৷

ইতিমধ্যে ডাৱৰ বিস্ফোৰণৰ ফলত তেজপুৰৰ পৰা টাৱাঙলৈ যোৱা 211 ৰাষ্ট্ৰীয় ঘাইপথ, চেৰগাঁৱ কালেটাং হৈ ৰূপা সংযোগী পথ, ভালুকপুং-ব'মডিলা-চাৰিদুৱাৰ পথত অব্যাহত আছে ভূ-স্খলন, অৱশ্যে ব'মডিলা আৰু টাৱাঙৰ মাজত যোগাযোগ অব্যাহত আছে ৷

ডাৱৰ বিস্ফোৰণৰ ফলত আৱদ্ধ 100 ৰো অধিক যানবাহনকে ধৰি বহুসংখ্যক যাত্ৰী ৷ ঘটনাৰ পিচৰে পৰাই 2গৰাকী ব্যক্তি নিৰুদ্দিষ্ট হৈ থকাৰ লগতে 110টা পৰিয়ালক সুৰক্ষিত স্থানলৈ স্থানান্তৰিত কৰা হৈছে ৷ বিগত তিনিদিন ধৰি ৰাজ্যখনত হোৱা প্ৰৱল বৰষুণৰ ফলতেই এই ঘটনা সংঘটিত হয় ৷ বৰ্তমানে জিলা প্ৰশাসনৰ তৰফৰ পৰা উক্ত স্থানত যান-বাহনৰ চলাচল নিষেধ কৰি ৰখা হৈছে ৷ ৰাজ্য চৰকাৰে সেনাবাহিনীৰ লগতে বৰ্ডাৰ ৰডছ অৰ্গেনাইজেশ্বনক অত্যধিক লোক নিয়োগ কৰি উদ্ধাৰকাৰ্যৰ লগতে পুনঃনিৰ্মাণকাৰ্য ক্ষীপ্ৰ কৰিবলৈ নিৰ্দেশনা প্ৰদান কৰিছে ৷