নিউজ ডেস্ক, 27 অক্টোবৰ : স্থলসেনাৰ পদাতিক বাহিনী (ইনফেন্ট্ৰি দে) দিৱস উপলক্ষে ৰাষ্ট্ৰীয় যুদ্ধস্মাৰকত উপস্থিত হয় চীফ অৱ ডিফেন্স ষ্টাফ জেন. বিপিন ৰাৱাট আৰু স্থলসেনাধ্যক্ষ চীফ অৱ আৰ্মি ষ্টাফ জেন. মনোজ মুকুন্দ নাৰাৱানে ৷ স্থলসেনাৰ 74 সংখ্যক পদাতিক বাহিনী দিৱস উপলক্ষে নতুন দিল্লীস্থিত ৰাষ্ট্ৰীয় যুদ্ধস্মাৰকত শ্বহীদক সামৰিক শ্ৰদ্ধাঞ্জলি প্ৰদান কৰে দুয়োগৰাকী শীৰ্ষ বিষয়াই ৷
1947 চনত আজিৰ দিনটোত কাশ্মীৰ উপত্যকাত হোৱা পাকিস্তানী বিদ্ৰোহীৰ আক্ৰমণৰ বিৰুদ্ধে ভাৰতীয় স্থলসেনাৰ প্ৰথমটো সামৰিক অভিযানৰ স্মৃতিত প্ৰতিবছৰে 27 অক্টোবৰত স্থলসেনাই পদাতিক দিৱস (ইনফেন্ট্ৰি দে) হিচাপে পালন কৰে ৷
লগতে পঢ়ক : মঙলবাৰে হ'ব ভাৰত-আমেৰিকাৰ তৃতীয়লানি 2+2 আন্তঃমন্ত্ৰী আলোচনা
এই অভিযানত স্থলসেনাৰ শিখ ৰেজিমেন্টৰ প্ৰথম বাহিনীয়ে বিজয় সাব্যস্ত কৰিছিল ৷ আজিৰ এই দিৱসত চিডিএছ আৰু চীফ অৱ আৰ্মি ষ্টাফৰ সৈতে 1962ত ৰেজাংলাত শেষৰজন সৈনিকলৈকে যুদ্ধ কৰা শিখ আৰু কুমাওন ৰেজিমেন্টৰ বিষয়া আৰু জোৱানসকল উপস্থিত থাকে ৷ আজিৰ দিনটোতে 1947 চনত শ্ৰীনগৰত উপস্থিত হৈছিল শিখ আৰু কুমাওন ৰেজিমেন্টৰ সৈনিকসকল আৰু পাকিস্তানৰ কাবাইলিছৰ পৰা শ্ৰীনগৰ বিমানবন্দৰক ৰক্ষা কৰিছিল ৷ কুমাওন ৰেজিমেন্টৰ চতুৰ্থ বাহিনীৰ সৈনিকসকলে এই অভিযানত শিখ ৰেজিমেন্টৰ প্ৰথম বাহিনীৰ সৈতে একেলগে যুদ্ধত নামিছিল আৰু এইবাৰ দুয়োটা ৰেজিমেন্টৰ বিষয়া-জোৱানসকল আজিৰ পদাতিক বাহিনী দিৱস কাৰ্য্যসূচীত ৰাষ্ট্ৰীয় যুদ্ধস্মাৰকত উপস্থিত আছিল ৷
আনহাতে ৰেজিংলাত ইতিহাস ৰচনা কৰিছিল কুমাওন ৰেজিমেন্টৰ 13 বাহিনীৰ মেজৰ চৈয়তান সিঙে (পৰম বীৰ চক্ৰ, মৰনোত্তৰভাৱে) ৷ ৰেজাংলা হৈছে বিগত মাহত ভাৰতীয় সেনাই পুনৰ দখল কৰিবলৈ সক্ষম হোৱা পাংগং ছ্য হ্ৰদৰ দক্ষিণ প্ৰান্তৰ এক অঞ্চল ৷ 1962ৰ এই বিজয়কো পদাতিক দিৱসত গৌৰৱেৰে উদযাপন কৰা হয় ৷
উল্লেখ্য যে, দেশৰ প্ৰথমটো পৰম বীৰ চক্ৰ কুমাওন ৰেজিমেন্টৰ চতুৰ্থ বাহিনীৰ মেজৰ সোমনাথ শৰ্মাক মৰনোত্তৰভাৱে প্ৰদান কৰা হৈছিল ৷ এই অভিযানৰ বাবেই শিখ আৰু কুমাওন ৰেজিমেন্টে আজিৰ দিনটো পদাতিক বাহিনী দিৱসৰ উপৰিও ৰেজিমেন্টেল দিৱস হিচাপেও উদযাপন কৰে ৷
লগতে পঢ়ক : আৰ্মি কামাণ্ডাৰ কনফাৰেন্স সম্বোধন কৰিব প্ৰতিৰক্ষা মন্ত্ৰী ৰাজনাথ সিঙে
