নিউজ ডেস্ক , 18 ডিচেম্বৰঃ সংশোধিত নাগৰিকত্ব আইনখনৰ বিৰোধিতাৰে সমগ্ৰ দেশতে প্ৰতিবাদ অব্যাহত থকাৰ ফলত বিঘ্নিত হৈছে আইন শৃংখলা জনিত পৰিস্থিতি ৷ ইয়াৰ পৰিপ্ৰেক্ষিততে পশ্চিমবংগৰ হাওৰা জিলাত মঙলবাৰে বিয়লি 5 বাজালৈকে ইন্টাৰনেট সেৱা স্থগিত কৰি দিয়া হয় ৷ সতৰ্কতামূলক ব্যৱস্থা হিচাপে পশ্চিমবংগৰ বিভিন্ন জিলাত অস্থায়ীভাৱে ইন্টাৰনেট সেৱা বন্ধ কৰি দিয়া হয় ৷
ইপিনে বহু বিতৰ্কিত নাগৰিকত্ব আইন, 2019 ৰ বিৰোধিতাৰে অসমৰ ডিব্ৰুগড়ত অব্যাহত থকা উত্তাল প্ৰতিবাদক লক্ষ্য কৰি জিলা খনত সান্ধ্য আইন জাৰি কৰা হৈছিল ৷ অৱশ্যে পৰিস্থিতি কিছু সামান্য হোৱাত মঙলবাৰে জিলা প্ৰশাসনে পুৱা 6 বজাৰ পৰা বিয়লি 8 বজালৈকে জিলা খনত সান্ধ্য আইন শিথিল কৰি দিয়ে ৷ আনহাতে বৰ্তমানলৈকে গুৱাহাটীত হৈ থকা অপ্ৰীতিকৰ পৰিস্থতিৰ বাবে আৰক্ষীয়ে এই সন্দৰ্ভত 136 টা গোচৰ ৰুজু কৰাৰ লগতে সমগ্ৰ ৰাজ্যৰ পৰা 190 জন প্ৰতিবাদকাৰীক গ্ৰেপ্তাৰ কৰিছে ৷ সম্প্ৰতি অসমৰ বিভিন্ন জিলাত ইন্টাৰনেট সেৱা স্থগিত কৰি ৰখা হৈছে ৷
লগতে পঢ়ক- নগাঁৱত অসম জাতীয়তাবাদী যুৱ ছাত্ৰ পৰিষদৰ অনশন
